RTPA emite l'alderique eleutoral de los candidatos al Congresu'l 23-X de partíos con representación

Estrúcturase en cuatro bloques temáticos nos que cada cabeza de llista a la Cámara Baxa va contar con 4 minutos d'intervención.

Adriana Lastra (PSOE), Esther Llamazarez (PP), Rafael Cofiño (Sumar) y José María Figaredo (VOX), los candidatos de los cuatro partíos con representación nel Congresu por Asturies, participen esta nueche nel alderique eleutoral sobre'l 23-X. Entámalu y emítelu en direuto RTPA pela televisión y pela radio, colos periodistes Natalia Alonso y Nacho Montserrat, que yá conduxeren el del 28-M, como moderadores.

Va arrancar a les 22.30 hores con un minutu pa cada políticu pa esponer lo que considera que se xuega Asturies esti domingu. Llueu van tratase cuatro bloques temáticos –economía y industria; infraestructures; mediu ambiente y mediu rural, servicios públicos y derechos sociales; y rellaciones ente gobiernos y pautos eleutorales–, nos que van disponer del mesmu tiempu, 4 minutos en caún d'ellos a repartir nes intervenciones que consideren necesaries.

Pa finar, van contar con un minutu final pa dirixise a l'audiencia ensin interrupción. Los diferentes ordes, asina como'l posicionamientu nel plató, van decidise por sortéu.