RPA recupera los informativos de fin de selmana y TPA repón 'Animalada Xabaz'

La televisión pública torna a programar la única temporada del programa infantil n'asturianu.

El gran vacíu informativu en RPA na fin de selmana va iguase dende mañana. A les 10 hores va dase'l primer boletín de noticies del día y a les 14.30 va estrenase 'Asturias Hoy FS', de 30 minutos de llargor, que tamién va tener presencia los domingos.

D'esta forma complétase la programación esistentes hasta agora de llunes a vienres, con ocho boletines diarios a les hores en puntu y los programes informativos 'Asturias Hoy 1' (8 hores), 'Asturias Hoy 2' (14 hores) y 'Asturias Hoy 3' (20 hores). El parte de les 12 d'estes xornaes ye l'únicu nel que l'asturianu tien presencia.

8 capítulos

Na TPA mañana va principiar la reposición de los capítulos de 'Animalada Xabaz', producción n'asturianu pa la reciella que s'estrenó na Selmana Santa del 2021. Dende entós nun hebo más programación infantil na televisión pública asturiana.

A les 9.20 hores ta marcada na programación de TPA el reestrenu de les aventures de la cabra Telva, el xabaril Xuacu y la osa Sabela –falante de gallego-asturiano– y el restu de personaxes. En total grabáronse 8 capítulos de 25 minutos caún d'esta serie de Covenant Audiovisuales –disponible en 'A la carta' na web de la RTPA– gracies a la convocatoria ‘Asturies crea cultura / Asturies crea sinerxes’ entamada pola Conseyería de Cultura, Política Llingüística y Turismu y RTPA pa la ellaboración de conteníos n’asturianu nel ente.

Na imaxe, una captura d'un capítulu de 'Animalada Xabaz'.