Rodríguez Medina: “El réxime d’internamientu favorez la normalidá que nun hai na sociedá”

Pablo Rodríguez Medina (L’Entregu, 1978) ye un profesor fixu na UABRA dende la so creación. L’escritor imparte dos módulos nel cursu avanzáu de Llingua Asturiana: Téuniques de Creatividá Lliteraria y Sistemes Comunicatives Escrites II.

¿Qué ye lo que se trabaya nestos dos módulos?

Nel de Situaciones Comunicatives Escrites lo que facemos ye habilitar o finxir situaciones que se nos pueden dar nel momentu que tengamos qu’utilizar la llingua por escrito a distintos niveles, tanto a nivel cotidianu, como pueden ser diarios o notes, o formal, con distintos receptores. Asina, trabayamos la llingua na alministración, nos anuncios, en fueyes de reclamación, instancies, noticies o entrevistes.

Tanto ésti como’l de creación lliteraria son módulos útiles, pero duros pal alumnáu porque hai que trabayar bastante. Nun ye como Situaciones Comunicatives Orales, nes que se trabaya d’una manera muncho más práutica. Nes mios clases ellos escriben, por poner un exemplu, una presentación d’un blogue, y llueu yo corríxolo y vamos tratando los fallos d’ortografía o d’adecuación al contestu. Recíbenlo bien, pero tienen qu’implicase muncho, al igual que nel de téuniques de creatividá. Nésti lo que tratamos ye habilita-yos el llau connotativu de la llingua. Nun se trata tanto de qu’ellos faigan obres o una novela, porque son cinco hores, sinón qu’aprendan a utilizar esi llau qu’ellos tienen arraigáu, en cuanto a esperiencia, a la llingua. Asina, en clase faen rellatos curtios, un poema, traces de diccionarios personales o comenten dende’l puntu de vista de la ficción dalguna semeya suxerente.

¿Cómo ye’l nivel qu’amuesen los alumnos?

Ye bono. Hai estremaos niveles, pero en xeneral vienen con un compromisu grande pa col cursu; nun lleguen equí col oxetivu de conseguir unos creitos, como puede asoceder n’otros cursos. El réxime d’internáu tamién favorez que tol mundu emplegue la llingua asturiana pa falar y el nivel, n’avanzáu al menos, suel ser mediu-altu. Esti añu sobre too hai composiciones feches por alumnos que tienen muncha calidá. Malpenes tengo que correxir. Yo lo que trato de facer ye da-yos otres opciones. Por exemplu, que sepan qu’en llugar de ‘debío a’ pueden utilizar ‘por mor de’ o ‘en cuenta de’, que son espresiones qu’a lo meyor tienen interiorizaes pero que nun activen al ponelo per escrito.

En xeneral, ¿qué-y pue aportar a un escolín facer el cursu avanzáu d’asturianu de la UABRA?

Un conocimientu; una puesta en común sobre la situación de la llingua y la situación d’Asturies en distintos niveles. Pue aporta-y conocer xente que comparte los mesmos intereses; conocer xente que lleva munchos años a pie de llabor de recuperación etnográfica, non solamente venceyao a lo que ye la llingua, que tamién; y compartir con xente esperiencies comunes. Pienso que ye dalgo gratificante a tolos niveles, totalmente recomendable inclusive pa les persones que piensen que tienen un nivel bastante curiosín, yá que siempre nos queda por aprender, tamién a los profesores. Otra manera, les persones que yá tienen un nivel cuenten cola posibilidá de facer cursos d’afondamientu, daos por xente totalmente acreditao nos sos campos, nos que se comparte y se ponen en valor munches esperiencies. Ye una perbona manera de poner en práutica y estimular la llingua.

El réxime d’internáu tamién ye una manera de favorecer la normalidá que nun hai na sociedá. Equí, de dalguna manera, los que venimos podemos emplegar y emplegamos la llingua asturiana al 100 por cien nes nueses rellaciones y vese que ye una completa normalidá. Nun pararon tovía los autobuses nin pasó nada estraño. Amás, cuando charramos unos con otros daste cuenta que ye una situación normal y que debería ser lo normal na vida normal.

Les actividaes paraleles entamaes pola UABRA, como conferencies o conciertos, son tamién un bon complementu.

Pienso que ye dalgo sensacional porque, por exemplu, pudimos presenciar una conferencia de patrimoniu que nos permitió ponenos al día sobre cuála ye la situación del patrimoniu asturianu, o otra sobre la economía que t’asitia un poquitín sobre la realidá d’Asturies que munches veces nun se ve pela prensa y que, si se ve, ye d’una manera eslabazada.