Rocea pola llingua ente los socios de gobiernu n’Avilés

Dempués de les declaraciones del alcalde avilesín Santiago Rodríguez Vega al diariu "El Comercio - La Voz d'Avilés" en que dicía'l pasáu llunes que la llingua nunca criare tensión nin rocea nel sen del gobiernu de coalición ente PSOE y IX-BA que lleva la Villa del Adelantáu, el representante d'IX-BA n'Avilés y teniente d'alcalde José Fernando Díaz Rañón retruca güei al rexidor avilesín nel mesmu periódicu, nel qu'asegura que la llingua, contra lo qu'afirma l'alcalde "sí que foi motivu de diferencies nel equipu del gobiernu del conceyu", anque matiza que "otra cosa ye qu'eses diferencies nun llegaron a asoleyase públicamente".

Díaz Rañón, que declaró al periódicu avilesín que "la política desarrollada polos socialistes asturianos en materia llingüística choca colo que nos abulta necesario" diz que'l pautu de gobiernu n'Avilés nun peligra por esti asuntu, pero llamenta que los pasos que se dan en normalización n'Avilés nun van tolo apriesa qu'ellos quixeren.