Rivero llama a la reflexón pol aumentu de víctimes mortales n’accidentes llaborales

El conseyeru d’Economía y Emplegu, José Manuel Rivero, llamó esti martes a la reflexón sobre los motivos que lleven al aumentu nel país de les víctimes mortales n’accidentes llaborales. No que va d’añu morrieron 25 persones.
 
Rivero, tres la firma d’un conveniu ente la Universidá d’Uviéu y la empresa Indra nel campus de Xixón, fixo referencia a la baxada de siniestros llaborales en xeneral esti añu que, por contra, vien acompañada por un aumentu de los mortales, lo que pal conseyeru ye dalgo “preocupante”. Por ello, llama a tolos axentes implicaos a la reflexón pa evitar que se repitan esti tipu d’accidentes.
 
La secretaria de Salú Llaboral d’UXT Asturies, Esther Alonso, tamién amosó güei la so preocupación por esti asuntu y señaló que dende’l mes de xunetu morrieron n’Asturies 16 persones nel trabayu, más del doble que’l rexistráu nel mesmu periodu del 2010. Estos datos suponen una medra de la siniestralidá mortal respeutu al añu pasáu del 128 por cientu en namái trés meses y mediu, periodu nel que, por otra parte, rexistróse una actividá baxa poles vacaciones braniegues. Alonso considera "inalmitible" esta escalada de la siniestralidá mortal y esixe que s’exerza un control mayor y vixilancia del cumplimientu de la llei y non simples inspeiciones documentales nes empreses que nun verifiquen les condiciones verdaderes nes que se ta trabayando.
 
Dende’l sindicatu sostienen que van a perseguir y denunciar a tolos empresarios que ponen en riesgu la seguridá y la salú de los trabayadores. “Queremos que se depuren responsabilidaes hasta’l final. Tenemos claro que los accidentes son evitables y esiximos a los empresarios que, pese a tar en tiempos de crisis, nun escatimen recursos en midíes de seguridá que pongan en riesgu la vida y la salú de los trabayadores”, señaló Alonso.
 
Otra manera, UXT, CC OO y USO van retomar les concentraciones n’Uviéu tres cada víctima mortal nel so puestu de trabayu n’Asturias, decisión tomada polos responsables de salú llaboral de los trés sindicatos, que nun descarten convocar una gran movilización nacional contra la siniestralidá llaboral. Un trabayador xixonés de 45 años, G.V.C., foi ayeri la última víctima mortal al caer desde cinco metros d’altor d’un poste de la lluz en San Roque, Llanes.