Ripa considera "absolutamente escandalosu" el nomamientu d'Areces

|

El secretariu xeneral de Podemos Asturies afirma que la decisión de la xestora de Javier Fernández "recuerda a les maniobres del Partido Popular con Barberá".

Daniel Ripa llamenta que'l mierense recompense con esti cargu nel Senáu "al responsable políticu del Marea y de los sobrecostes d'El Musel, casos que siguen desangrando Asturies". "A naide-y paecería normal que'l PP escoyera a Rita Barberá como vocera nel Senáu, o que Griñán o Chaves ocupasen la presidencia de la xestora”, manifestó ayeri tres conocer l'anuncia fecha pol voceru de dicha xestora, Mario Jiménez, un nomamientu que'l políticu nacíu en Chaca considera "absolutamente escandalosu".

"El PSOE punxo al frente del Senáu al ex presidente Areces, el cerebru de l'ampliación d'El Musel –que ta anguaño siendo xulgada na 'Audiencia Nacional'–, al responsable políticu del Casu Marea y onde en pocos meses pue ser condenada la so antigua mano derecha, Riopedre, por robar hasta 10 millones d'euros de los colexos, presuntamente, desviaos en comisiones, regalos, presuntos favores..., a funcionarios y collacios de la conseyería”, recuerda Ripa, qu'añade que “la xeneración de los dinosaurios políticos de la FSA, marcada pol clientelismu, los sobrecostes, l'endeudamientu, el paru, la emigración masiva..., tomaron Ferraz y, con ello, esportaron la única marca Asturies que conocen: la marca Asturies de la corrupción estructural de los sos gobiernos".

La xestión "desastrosa" del ex presidente

Pa finar la so intervención, el responsable de Podemos Asturies apuntó dellos aspeutos de la xestión "desastrosa" de Vicente Álvarez Areces: "Dexónos 800 millones d'euros de dineru públicu tiráu al mar n'El Musel; 380 millones con una regasificadora que nun va funcionar; 330 millones d'euros en deudes de les empreses de promoción de suelu industrial como Sogepsa o la constructora Sedes; 150 millones en sobrecostes na construcción del Hospital Universitariu Central d'Asturies, etc., dexando una Asturies endeudada y en ruina económica, con decenes de miles de mozos emigraos y humillaos polo qu'él llamó 'lleendes urbanes'”.

Contador Estadistiques