Riopedre y Otero declárense inocentes na primer xornada de la comisión pol ‘Casu Marea’

José Luis Iglesias Riopedre y María Jesús Otero, en llibertá baxo fianza, declaráronse inocentes na primer xornada de la Comisión Parllamentaria pol ‘Casu Marea’. Dambos, al igual que Marta Renedo, nun respondieron nenguna entruga.

Tanto l’ex conseyeru de Sanidá como la ex directora de Centros y Planificación lleeron un escritu preparáu xunto colos sos abogaos enantes de principiar la ronda d’entrugues de los voceros de los cinco grupos parllamentarios de la Xunta Xeneral, ensin que respondieran nenguna. Los dos cargos altos del Executivu de Vicente Álvarez Areces declararon la so inocencia y aseguraron nun tener que ver coles axudicaciones irregulares a les empreses Igrafo y Almacenes Pumarín. Pela so parte, Renedo, namái señaló que s’acoyía al so derechu a nun declarar y a nun responder a les entrugues.

Mañana va tener llugar la segunda xornada de una Comisión Parllamentaria impulsada por UPyD que foi criticada dende’l primer momentu pol Bloque por Asturies, formación personada como acusación popular nel ‘Casu Marea’, al considerala “de paripé monumental”, como señaló’l so voceru nacional, Manuel Benayas, el 7 de febreru pasáu tres conocese la decisión del xuez Ángel Sorando d’ imputar a Ana Rosa Migoya y a Carlos Madera. “Depués de trés años d’instrucción xucidial principia agora a funcionar una Comisión Parllamentaria onde yá sabemos que los imputaos, o los que se tienen que xugar dalgo, nun van dicir nin pío”, auguró Benayas. Precisamente, Migoya ta llamada a comparecer mañana xunto col ex presidente Álvarez Areces y los cargos altos Jaime Rabanal, Luis Iturrioz, Encarnación Rodríguez Cañas y Herminio Sastre.