Riopedre intervino na inauguración de les xornaes de l'ALLA

La inauguración ayeri de les X Xornaes Internacionales "Llingua Minoritaria y Educación" dio pa una sorpresa fuera de programa. Ello foi que'l Conseyeru d'Educación José Luis Iglesias Riopedre aprovechó la ocasión pa dar anuncia de que la so estaya de gobiernu va entamar a mediaos d'abril una campaña nueva p'afalar al estudiu del asturianu.

Nun diba ser la primer vegada que la conseyería ficiere una campaña d'estes característiques, pero Riopedre aprovechó la so intervención na inauguración de les Xornaes qu'entama l'Academia de la llingua Asturiana pa falar sobre la escolarización del asturianu. El conseyeru sorrayó qu'hai 3.500 alumnos estudiando asturianu en primaria, y dio anuncia de que van presentase, d'equí a poco, los currículos de Primaria y Bachilleratu y que yá ta abierta la convocatoria pa facer los llibros de testu. Riopedre faló tamién de la xuba de la plantiya d'asturianu, que dixo qu'anda sobre los 150 docentes.