Río Narcea Gold Mines, nel güeyu de la polémica

Cinco años dempués d'abrise la mina d'oru de Carl.lés, en conceyu de Salas, el diputáu del PP Ramón García Cañal, alvirtió ayeri na Xunta Xeneral del Principáu que'l so grupu políticu va denunciar al alcalde de Salas por delitu de prevaricación al da-y llicencia a la empresa p'abrir la mina ensin tener autoridá pa ello. García Cañal acusó a José Manuel Menéndez de concedé-y la empresa llicencia d'obra en suelu non urbanizable ensin autorización de la Comisión d'Urbanismu y Ordenación del Territoriu d'Asturies (CUOTA) y ensin tener competencia urbanística nel asuntu. Cañal, qu'acusó a l'alministración autonómica de consentir colos conceyos d'alcalde socialista en materia urbanística, remembra amás que parte de lo qu'agora ye la esplotación n'abertal de Río Narcea Gold Mines yeren mayormente finques propiedá personal del alcalde de Salas.

Según el PP, la Conseyería de Mediu Ambiente retiró-y al alcalde de Salas yá nel añu 2001 la competencia urbanística nesti asuntu por nun tramitar l'espediente de disciplina urbanística, mandando parar les obres y concediéndo-y dos meses a la empresa promotora de les mesmes pa que repitiere'l procesu de solicitú, llegándose hasta'l día de güei ensin que se normalizare la situación, esistiendo actualmente un recursu de la Conseyería contra la última resolución del conceyu concediendo la llicencia. Pela so parte, la empresa Río Narcea Gold Mines diz que tol procesu en Carl.lés atúvose a la llegalidá, mientres que Cañal llega a suxerir un tratu d favor a la mesma en cuantes que'l conceyu namás-y cobró a la empresa 3.000 euros por facer el trámite de llicencia, mientres qu'un vecín que quiera poner una nave pa ganadería tien de pagar 5.000.

Río Narcea lleva una selmana nel güeyu de la polémica yá seya directa o indirectamente. Dempués de conocese les alegaciones que los ecoloxistes asturianos presentaron contra'l proyectu de mina d'oru que la multinacional Río Narcea Gold Mines quier sacar alantre en Os Llagos de Silva (Salave - conceyu de Tapia) la empresa minera ta acabante de recibir confirmación de la sentencia a la escontra de la empresa qu'emitieren los tribunales d'Extremadura en setiembre del añu pasáu por entamar les obres d'apertura de la mina de niquel d'Aguablanca (Monesterio-Badajoz) ensin el permisu precisu pa ello de l'alministración. La sentencia mandaba aparara la obra hasta que se tuvieren les pertinentes llicencies del conceyu, y anque Río Narcea recurrió la sentencia, el Tribunal Superior de Xusticia d'Extremadura ta acabante de desestimar el recursu, obligando a la empresa a pagar toles costes del xuiciu.

Ecologistas en Acción de Extremadura lleva denunciando dende va dos años p'acá l'actitú de la empresa, que dicen que ta abriendo la mina de manera illegal dafechu. Según el colectivu verde d'Extremadura, Río Narcea lleva esfarraplaes 120 hectárees de dehesa y monte de les 350 que contempla'l proyectu ensin contar con permisos, entamando amás va poques feches el funcionamientu en prebes de la planta de tratamientu de mineral no que califiquen d'una actitú "vergoñosa y descarada".

La Mina de níquel que Río Narcea quier abrir n'Aguablanca asítiase en Monesterio, un llugar ente Extremadura y Sevilla que ta atiestando con dos núcleos d'espaciu protexíu que se pretende que seyan reserva natural de la biosfera. La mesma empresa reconoz que la tasa de niquel nun ye mui grande, polo que la rentabilidá de la mina va ser tirando a baxa, falándose d'un plazu d'esplotación del yacimientu d'once años, anque en casu de nun traer cuenta, la mina podría abandonase primero, dexando una balsa d'estériles atacada de metal pesao en suspensión asemeyada a la que dexó Boliden. Pa más aquello, la obra de la mina amenaza directamente a les canales que lleven l'agua que consume la ciudá de Sevilla.