Ricardo Valdés, cola meyora de les carreteres asturianes pal ciclismu

El Grupu de Desarrollu de la Montaña Central y el CeCodet de la Universidá d'Uviéu firmaron un alcuerdu pa la planificación y diseñu del proyectu "Desarrollu del ciclismu como marca territorial nos conceyos de la Montaña Central Asturiana". La iniciativa, que va financiase con fondos del plan Proder, tien l'oxetivu de facer un aniellu ciclista y cicloturista, col Angliru como ganchu y referente del plan, que cuenta con meyorar el tirón turísticu d'estos conceyos del centru d'Asturies y con facer de les carreteres de Riosa, Morcín y demás conceyos de la redolada un llugar seguru pel qu'andar en bicicleta

El documentu pa desarrollar el plan ta agora en manes de la Universidá d'Uviéu, que cuenta con tenelu termináu nun plazu d'un añu. Les conclusiones del trabayu treslladaranse dempués a les alministraciones que van tener de llevales a la práctica. Ente los puntos a tratar pol informe ta'l de peritar la situación actual de les carreteres y la seguridá que dan pa la práctica del ciclismu, desarrollando rutes propuestes nes que tendrán de desaniciase puntos negros pa les bicicletes remocicando barreres, estudiando l'adherencia de los esfaltos, la densidá de los tráficos o l'alumbrao de de cruces y curves.

Na firma del conveniu, que se fizo ayeri en Riosa tuvo presente xunta l'alcalde riosán José Antonio Muñiz, el ciclista profesional asturianu Ricardo Valdés, que va collaborar como asesor nel desarrollu del proyectu.