Rexístrense altos niveles d'ozonu n'Avilés

|

Na tarde y nueche del llunes 18 rexistráronse siete superaciones del nivel d'información y una del nivel d'alerta, ensin el preceptivu avisu a la población sensible.

Ecoloxistes n'Aición informen que nel día pasáu llunes produciéronse n'Avilés siete superaciones del nivel d'información d'ozonu troposférico, establecíu pola normativa en 180 microgramos d'ozonu per metro cúbicu d'aire, como media horaria. Toes produciéronse na céntrica estación de control de la contaminación de la Plaza de la Guitarra, nun episodiu qu'empezó a les 8 de la tarde y enllargóse hasta les 4 de la madrugada de güei martes. La máxima contaminación por ozonu rexistróse a les 2 de la madrugada, cuando se llegó a 243 microgramos per metru cúbicu, superando'l nivel d'alerta establecíu pola normativa en 240 microgramos d'ozonu per metru cúbicu d'aire, como media horaria

La previsión de la superación del nivel d'información obliga a les autoridaes competentes a alvertir a les persones más sensibles a la contaminación atmosférica, tales como neños y neñes, persones mayores, muyeres xestantes o persones con problemes respiratorios o cardiovasculares, de que se protexan evitando nes hores centrales del día y a la tradiquina cualquier esfuerzu físicu y los exercicios al campu. Tamién tienen d'informar sobre la previsión d'evolución de la contaminación, les árees afectaes y la duración del episodiu.

Sicasí, el Principáu d'Asturies nun espublizó ayeri nengún avisu a la población mientres esti episodiu de bien elevada contaminación por ozonu, incumpliendo la so obligación llegal y dexando desasistidos a los 600.000 habitantes de la zona afectada. Trátase d'una grave neglixencia del Gobiernu autonómicu, obligáu a informar d'estes situaciones, según informa'l grupu ecoloxista.

Dende Ecoloxistes n'Aición esixen al Principáu d'Asturies que cumpla cola so obligación de caltener informada a la población, garantizando'l derechu a la salú pública y ante la persistencia de les elevaes temperatures y niveles d'ozonu mientres güei martes, d'alcuerdu a les previsiones de l'Axencia Estatal de Meteoroloxía, Ecoloxistes n'Aición demanda l'adopción de les midíes necesaries d'urxencia pa evitar volver algamar l'estragal d'información por ozonu. Midíes que tienen de pasar pola llimitación del tráficu urbanu ya interurbanu y del funcionamientu de les centrales térmiques asturianes de carbón, principales emisores de los contaminantes precursores del ozonu.

L'ozonu troposférico, tamién conocíu como ozonu “malu” por contraposición al de la estratosfera, ye un contaminante secundariu producíu pola reacción ente la lluz solar y el dióxidu de nitróxenu y los hidrocarburos emitíos polos automóviles, centrales térmiques y delles industries. Por inhalación, provoca irritación de los güeyos y víes respiratories cimeres, una medría del riesgu d'enfermedaes respiratories agudes y amenorgamientu de la función pulmonar, según l'agravamientu de patoloxíes cardiovasculares. La OMS estima en 1.800 los fallecimientos prematuros añales n'España producíos de resultes de la esposición a niveles d'ozonu como los rexistraos estos díes. L'ozonu, amás de para les persones, ye tamién tóxicu pa la vexetación, estropiando los montes y amenorgando la productividá de los cultivos.

Contador Estadistiques