Retrásase la entrada en serviciu de la TV asturiana

Hasta últimos de marzu o primeros d'abril del 2006, la canal autonómica nun va tar en condiciones de funcionar con normalidá. Ello ye que los sos responsables cuenten con arrancar directamente con 12 hores d'emisión y saltase el periodu "en prebes" que taba previsto qu'entamare'l 8 de setiembre, día d'Asturies.

José Ramón Pérez Ornia, director del ente autonómicu de comunicación, compareció ayeri na comisión de control de la Xunta Xeneral del Principáu a entruga del PP, onde tamién esplicó que quier más que s'entame con tola programación yá preparada que non andar con una programación ensin continuidá y estrada de forros pa rellenar. Anque de cualquier manera entovía ye ceo pa dicir con qué formatu de programación va salir la TV a antena, Ornia adelantó que la programación va centrase mayormente nos informativos.

En cuantes a la posibilidá d'entamar una emisión en prebes el 8 de setiembre, Ornia púnxolo en dulda y, remembrando que sobre esti asuntu namás hai qu'una declaración d'intenciones del Presidente asturianu y non un compromisu en firme, dexó tala posibilidá pendiente de como se desarrollen les obres en Conventu de les Clarises de la Universidá llaboral de Xixón, que va ser la sede la TV. Ornia si quixo afitar que pal 8 de setiembre va ser posible emitir la carta d'axuste, pero nun van tar feches nin les plantiyes nin se va disponer de los equipos. D'otra manera, el director del Ente quitó-y importancia al que se pudiere emitir el 8 de setiembre porque la señal nesa fecha diba tener una cobertura mui pequeña.

Con too y con ello, el director de la canal defendió la rapidez con que ta llevándose alantre la creación del Ente, remembrando que mientres otres canales autonómiques precisaron hasta de 18 meses pa entamar a emitir, l'asturiana va facelo en 14.

El director del ente dio parte de les perres que se lleven gastaes hasta agora na puesta en marcha que desde que tomo posesión el pasado 31 de enero hasta el 31 de mayo se gastaron 149.595 de la canal. Dende la so llegada al cargu, el gastu llega a los 79.402 euros pa la puesta en marcha del ente 72.944 de los mesmos en pagu de nómines -cantidá qu'incluye 57.270 pa los 9 miembros del conseyu d'alministración y 11.923 euros pal Conseyu de Comunicación. Ornia adelantó tamién más datos sobre'l procesu de contratación de la plantiya de la TV, pa la que van ufiertase 84 places de les que 26 d'elles van dase per concursu oposición y les demás per oposición llibre. Ensin entrar a la cuestión de la llingua Ornia comentó que en dambos casos va valorase'l conocimientu de la realidá sociocultural asturiana.

El director del Ente sorrayó que la TV autonómica nun vien a ser la competencia de les canales locales esistentes y adelantó otra novedá, que va ser la entrada de la canal autonómica asturiana na Federación d'Organismos de Radio y Televisión Autonómiques, la FORTA, por un importe de 325.000euros al añu que va dar derechu al intercambiu de 250.000 noticies al añu, anque de momentu'l fútbol de Primera División va quedar fuera del alcuerdu por tener un coste que nun se podía asumir.