Reteyaores demanda la traducción de documentos básicos pa normalizar l’idioma nel sector de la construcción

La empresa Reteyaores recibió’l vienres en Xixón el Pegollu de los XXXII Premios Andrés Solar. Moisés Noval, representante de la  firma con sede en Sariegu, demandó “a los órganos competentes nestes materies” la so intervención pa la traducción de documentos básicos pa normalizar l’usu del idioma na construcción.

“Nun sólo taríemos poniendo escuela y creando una ferramienta motivadora pa trabayar nel mio sector na nuesa llingua, sinón qu’amás facilitaríamos el trabayu a aquellos arquiteutos y aquirteutos téunicos que quieran trabayar nel nuesu idioma que nun tienen la posibilidá porque nun tienen los conocimientos básicos de la llingua o nun tienen el valor o la inconsciencia que tenemos los ‘reteyaores’. Ye urxente y necesario si queremos normalizar l’usu del asturianu, se saque a la cai, y l’asturianu ande en tolos sectores de la vida cotidiana”, afirmó Noval. Ente los documentos necesarios que citó pa la so torna al idioma, taben “el Códigu Téunicu de la Edificiación (CTE) n’España y los documentos básivos vixentes que lu acompañen, y les Bases de Precios de la Construcción d’Asturies”.

Enantes, Noval recibiera de manes de Lali Solar, hermana d’Andrés Solar, qu’acudió como tolos años al actu del Centru de Cultural Antiguu Institutu acompañada del so maríu Jesús. Na so intervención el responsables de Reteyaores destacó que “pa nós ye un arguyu” recibir el Pegollu de la Xunta pola Defensa de la Llingua Asturiana (XDLA) que “valora la nuesa vocación d’usar la llingua asturiana nel sector nel que desendolcamos los nuesos servicios y la nuesa vida cotidiana”.

Tamién citó l’aumentu de la presencia del asturianu na publicidá de delles empreses de fuera del sector cultural, onde l’asturianu sí cuenta con un pesu importante, lo qu’amuesa que “l’asturianu vende”. Sicasí, apuntó que’l compromisu colo idioma de Reteyaores vien pol “respetu a la cultura cola que nacimos, al espardimientu d’ésta y a la definición y diferenciación pola nuesa identidá de pueblu”.

D’igual forma, fixo una llamada d’atención pa que les xeneraciones nueves reconozan “la deuda pendiente pa colos nuesos vieyos, los nuesos aldeanos y los lluchadores del mundu rural asturianu” por caltener vivu l’idioma.

Gallardones que reconstrúin trés décades d’historia

Por mor de l’ausencia de Gabino de Lorenzo, que nun vieno a recoyer el Madreñazu, l’antipremiu de los Andrés Solar, en nome de la Delegación del Gobiernu estatal n’Asturies “poles sos acciones y midíes rancies, discriminatories y contra derechu que toma valiéndose d’instituciones, cargos y perres públiques”, el siguiente en tomar la pallabra foi Carlos Pulgar, voceru de la XDLA, que fixo un repás al añu. En primer llugar, quixo agradecer la so asistencia a Lali y Jesús, pa depués destacar que los gallardones que lleven “el nome del nuesu militante Andrés” sirven “pa reconstruyir más trés décades de la historia contemporánea d’Asturies; pa poder reconstruyir la llucha incesante de la sociedá civil asturiana, la que vien llevando alantre pa llograr que l’idioma viva y se llogren los derechos llingüśticos plenos de tola ciudadanía”.

L’actitú de los responsables políticos cola llingua, citando a Javier Fernández, Mercedes Fernández ‘Cherines’ o Gabino de Lorenz,o foi criticada duramente por Pulgar, que punxo como exemplu de respuesta les concentraciones celebraes esti añu o la inicitiva ‘Conceyos pola Oficialidá’. Tamién llamentó “la inaición del Gobiernu” nel sector de la educación, cola especialidá docente paralizada al igual qu’iniciatives como’l plan pilotu pa facer l’asturianu vehicular en dellos centros, y la presencia del idioma na RTPA, “una ferramienta de sustitución llingüística y aculturización”, asina como l’emplegu que fai l’Alministración, que nun pasa d’una direición xeneral arrequexada en Cultura.

El voceru de XDLA tuvo pallabres de reconocimientu pa Reteyaores al recibir el Pegollu “que sostienen y llevanten la dignidá y el futuru de la nuesa llingua”, por ser una “empresa del sector de la construcción que vien llevando alantre’l so llabor con especial procuru nel tratamientu y usu del asturianu en tolos soportes comerciales y sociales que manexa”, como destacó l’acta del xuráu. “Nos ámbitos culturales, como la lliteratura o la música, l’asturianu ta gracies a la xente creador a un nivel de cuasi normalización; n’otros ámbitos de la vida socioeconómica nun pasa lo mesmo porque, ente otres coses, a les instituciones interesa-yos arrequexar y tematizar l’usu del idioma. Por eso consideramos tan importante l’exemplu de Reteyaores”, añadió Pulgar.

Pa finar, llamó a la ciudadanía a la “participación y reivindicación”. “La nuesa llucha va facer que la oficialidá venga y pase perriba de perxuicios y torgues”, siguió ente los aplausos del públicu, que pudo disfrutar de l’actuación musical de L-R (Leticia González & Rubén Bada) como zarru de la gala presentada pol periodista Naciu Varillas.