Retírase Chechu Rubiera, el ciclista que pidió la oficialidá

El ciclista asturianu Chechu Rubiera va retirase de la so carrera profesional el sábadu 30 d’ochobre, tres correr el Criterium d’Uviéu. El corredor que dio la cara pola oficialidá pon así fin a 16 años de ciclismu d’élite.

Chechu Rubiera (Xixón, 1973) entamó nel ciclismu profesional en 1995. Na so carrera algamó nueve victories, ente elles dos etapes nel Xiru de Italia, disputó 20 Grandes Vueltes per etapes y foi ún de los meyores escuderos de Lance Armstrong.

“Ye hora de disfrutar de la familia y tar más tiempu en casa. Considéromo un afortunáu por facer estos años lo que más me prestaba”, declara Chechu Rubiera na so páxina web. El sábadu 16 d’ochobre nel Xiru de Lombardía y el 30 d’ochobre nel Criterium d’Uviéu van ser les dos últimes carreres d’esti ciclista asturianu que mostró públicamente'l so apoyu a la oficialidá de la llingua asturiana.