Respuesta vecinal en Pruvia a “les falsedaes” de los opositores a la recuperación toponímica

|
Fozalguera dende Granda (Pruvia)

La propuesta de revisión toponímica presentada pola conceyalía de Participación de Llanera a los vecinos de Pruvia tres el trabayu de campu de Fernando Álvarez-Balbuena, cola qu’hebo conformidá, foi criticada llueu de manera sorprendente pola Asociación de Vecinos de Pruvia de Arriba (Asvepru) xunto col PP. Un comunicáu robláu por otros vecinos respuende agora “les sos falsedaes”.

Miguel Álvarez (Casa’l Miguelín) y Denis Soria (Ca Ceibal), dambos de Fozalguera, espliquen nel testu cómo se desendolcaron los acontecimientos. Asina, rellaten lo que pasó nel aconceyamientu del mes pasáu, nel que namái se manifestaron “dos inconvenientes”, que seríen la non revisión de los topónimos menores y la imposibilidá d’iguar agora la modificación pola que nel 1987, cuando pa la instalación de rede teléfonica se priorizaba los núcleos de población mayores, los doce barrios históricos de Pruvia se reduxeron a 7: Peñadrada y La Xonferiz axuntábense en ‘Pruvia de Arriba’, y Granda, El Picu, La Campana y Fozalguera en ‘Pruvia de Abajo’, términos inventaos qu’usen una forma castellana.

Los presentes coincidieron na conveniencia de tornar a la división de 12 barrios anterior, lo que requier un procedimientu diferente al tener que tratalu a nivel estatal, cola solución temporal de recurrir “a la xeneralidá de los nomes tradicionales de Pruvia Riba y Fozalguera” pa sustituyir ‘Pruvia de Arriba’ y ‘Pruvia de Abajo’, de manera respeutiva, cola posibilidá de camudar dalgún barriu d’ún a otru. “La propuesta presentada quedó a abierta a suxerencies de les distintes partes aconceyaes, les cuales nun tuvieron llugar hasta agora”, apunta’l comunicáu.

La sorpresa llegó cuando Avespru, “queriendo falar en nome de tolos pruvianos, refuga la propuesta de recuperación de los nomes escudándose en que contién “errores y omisiones” (ensin concretar cuáles) y onde se quexa de que nun foren consultaos...”. Nun tardó’l PP en salir en defensa d’esta postura y n’anunciar la so oposición a la revisión toponímica.

“Prestaríanos dexar claro a los partíos políticos que sientan la tentación de facer suyes les falsedaes d’Asvepru en busca de réditu eleutoral, qu’éstes respuenden namás a la opinión de los sos socios y a dellos afanes de protagonismu, en nengún casu al sentir de la mayoría de los vecinos de Pruvia”, afirmen.

Na semeya, Fozalguera dende Granda.

Contador Estadistiques