Residencia Lliteraria Xixón: “La idea ye que la visita tea siempre venceyada al asturianu, un camín d'ida y vuelta”, avanza Galán

La Residencia Literaria 1863 impulsada n’A Coruña pola poeta gallega Yolanda Castaño ye l'espeyu nel que se mira Inaciu Galán pa poner en marcha la Residencia Lliteraria Xixón. Cola idea de que sirva de ventana al mundu de la lliteratura asturiana, la pretensión ye inaugurala al entamu del añu qu’entra y ta acabante d’abrir una consulta pa escoyer los 24 retratos d’escritores asturianos que van decorar les paredes.

Un apartamentu mui lluminosu asitiáu nel xixonés barriu L’Arena va convertise na Residencia Lliteraria Xixón, un proyeutu personal del escritor y periodista, nuna collaboración ente l’Asociación Nial Cultural y Cuatro Gotes Producciones, nel que ta poniendo muncha ilusión. “Ye’l pisu onde yo vivía enantes que me mudara y onde tengo parte de la mio biblioteca”, esplica, un total de 2.000 títulos que quier ampiar “hasta los 5.000 o 6.000 que tenía ellí enantes de que me marchara”.

“Quería aprovechalu pa dedicalu al tema de la lliteratura, siguiendo la estela de la Residencia Literaria 1863 d’A Coruña que lleva 4 o 5 años en marcha”, continúa Galán. Esto ye, que sirva d’abellugu pa qu’escritores puedan desendolcar la so creatividá nun entornu diferente al suyu, ensin distraiciones, y, al empar, involucrase na vida cultural del llugar.

Pa ello ta en contautu con diferentes instituciones que financien estancies na Residencia Lliteraria Xixón, al estilu de la beca ‘Asturies’ que pudieron disfrutar Miguel Rodríguez Monteavaro y Pablo X. Suárez n’A Coruña, pa qu’escritores nes diferentes llingües del Estáu y el planeta pasen un tiempu y creen en Xixón, anque tamién taría abierta a autores o editoriales que quieran facer usu d’ella. “La idea ye que la visita tea siempre venceyada al asturianu, un camín d'ida y vuelta”, apunta’l periodista, que quier convertir estes visites creatives nuna ventana de la lliteratura asturiana al mundu.

Asina, el contautu cola actividá cultural de la villa y el país va ser un tema importante de la estancia. “Tamién queremos que sía una seña d’identidá l’entamu d’un taller del residente con esctritores y traductores, d’un o dos díes de llargor, pa llevar parte de la obra al asturianu”, rescampla Galán, contribuyendo asina a la normalización del idioma.

De momento la idea ta xenerando interés dientro y fuera d’Asturies, “onde paez que suena agora muncho la llingua asturiana pol too procesu sobre’l reconocimientu de la oficialidá”, a lo qu’ayuda muncho “la marca Asturies, que funciona mui bien, y los recursos turísticos y culturales que tien. Tamién l’actividá cultural de Xixón, con eventos como la Semana Negra, el POEX o la Feria del Llibru”.

Galán entiende amás que la Residencia Lliteraria Xixón asitia a Asturies como precursora d’un tipu d’inicitativa “que ta creciendo nel Estáu”, col modelu puestu en marcha por Yolanda Castañu como referente “porque ta consiguiendo poner la lliteratura gallega nel mapa internacional”. Asina, amás de la Rasidencia Literaria 1863, cita otra en Barcelona que ta acabante d’abrir, Vil·la Joana, “un masía que ta apartada de la ciudá a diferencia de la d’A Coruña”, y La Casa de Belmonte, n’Aragón, “una residencia coleutiva”.

Un apartamentu con trés espacios

Asitiáu en L’Arena, na carretera La Costa cola cai Piles, l’apartamentu ta formáu por un espaciu cocina-salón-biblioteca, una habitación mui amplia y, “los más guapo de too, un despachu que ye una galería con muncha lluz”. Ta asitiáu nel últimu pisu y, magar nun tener vista a la mar, nun cuenta con oposición d’otros edificios cercanos, lo que facilita la claridá.

Cola intención d’involucrar a la sociedá asturiana nel proyeutu, Galán ta acabante de facer una consulta na rede pa escoyer ente grandes nomes de la nuesa lliteratura que yá nos dexaron 24 representantivos pa que los sos retratos decoren les paredes de la Residencia Lliteraria Xixón. Van ser 12 homes y 12 muyeres d’una llista na qu’apaecen figures como Xosefa Xovellanos, Andrés Solar, Florina Alías, Fernán-Coronas, Nené Losada Rico o Marcos del Torniello, cola posibilidá de proponer otros autores nun incluyíos na primer escoyeta.

Na semeya, despachu de la Residencia Lliteraria Xixón.