Repsol va buscar petróleu n’Asturies

El Ministeriu de Fomentu que preside l'asturianu Francisco Álvarez Cascos ta acabante de da-y el preste al traviés d´un Real Decretu aprebáu pol Conseyu de Ministros a la compañía de petróleu Repsol-YPF pa entamar una serie d´investigaciones nes costes asturianes empobinaes a atopar hidrocarburos. Estes investigaciones petrolíferes van facese nun espaciu de 478.863 hectárees y per un tiempu másimu de seyes años. La empresa petrolera tien el derechu esclusivu nes investigaciones asina que´l teóricu beneficiu de les operaciones va dir en principiu namás a Respol-YPF. La compañía tien un presupuestu pa esti proyeutu de 16,5 millones d´euros anque puede ampliase en función de les necesidaes que tenga el desarrollu del programa d´investigación.

El subsuelu del Cantábricu tien bien d´interés pa les empreses petrolíferes dende ya va tiempu, y de fechu nun ye la primer vegada en que s´entama dalgún proyeutu d´investigación nes costes asturianes, nes que se sabe de xuro qu'hai petróleu, anque otra cosa ye que les condiciones del mercáu mundial del faigan rentable o non el esplotalo. Va entovía bien poco, nel añu 2.000, ficiéronse delles investigaciones alredor del potencial comercial de la riqueza del subsuelu marítimu astur, anque esta vegada parez que´l ámbitu del proyeutu ye más ambiciosu, albarcando cinco aries d'investigación nomaes de la 1 a la 5 col xenéricu "Ballena". Polo menos, asina parez en viendo que la empresa comprométese a invertir nel proyectu 16,5 millones d'euros.