Reny Picot entra n'Iraq cola ONU

La empresa asturiana Industrias Lácteas Asturianas (ILAS), propietaria de la marca de lleche Reny Picot, ye una de les cuatro empreses del Estáu que tan na llista de la ONU pa entamar otra vegada más el Programa de Petróleu per Alimentos con Iraq. La xera d´esti programa de les Naciones Xuníes ye ayudar a la población iraquino con medicines y alimentos con un calter humanitariu, recuperando una iniciativa que vien dende la primer Guerra escontra Iraq nel añu 1991, y, anque claramente nun cubre colos oxetivos, foi hasta agora la única alternativa humanitaria al bloquéu comercial del país



La ONU ta acabante d´espublizar una llista renovada de 327 empreses que collaboren nel programa humanitariu pa Iraq na que namás apaecen cuatro empreses del Estáu Español, Intagsa, que merca sistemes potabilización compacto; Laboratorios Hipra, de productos veterinarios; Ros Roca, fabricante de tanques d´agua pa sistemes de saneamientu; y Lubna Trading, compañía intermediaria que ye la qu´esporta'l llechi en polvo pa neños de l´asturiana Reny Picot. Otres seis empreses del Estáu tan pa entrar na llista de la ONU pa poder participar nel programa humanitariu. Les empreses españoles interesaes na reconstrucción d´Iraq nun les tienen toes con elles en cuantes que la ONU tien fechos contratos con empreses que nun tan incluyíes na llista. Amás el Gobiernu d´Estaos Xuníos lleva la inicitiva na reconstrucción y son solo les empreses norteamericanes les beneficiaes del procesu. Mentantu los empresarios españoles critiquen la parcialidá de la oficina de la ONU que xestiona'l Programa Petróleu per Alimentos énte el favoritismu que hai pa con les empreses franceses y ruses dende´l Conseyu de Seguranza de Naciones Xuníes.

Otramiente, l´asociación española d´empreses contratistes del Ministeriu de Defensa (Aesmide) tien preparáu un llistáu de 91 empreses pa reconstruyir Iraq. Ente elles ta la Central Llechera Asturiana a traviés de Corporación Peñasanta (CAPSA).