Renault quier ganar delles carreres con Alonso

Renault fizo ayeri la puesta de llargo del coche col que va correr la temporada 2005. Nel escenariu del esclusivu "forum Grimaldi" de Mónaco, l'equipu francés enseñó ente'l públicu oficialmente'l R-25, que yá ficiere prebes en Valencia la otra selmana.

La sorpresa nun taba polo tanto nel coche, pero sí en saber los oxetivos que se marca l'equipu p'anguaño. El director de la casa, Patrick Fauré, foi claru al esponelos. La idea ye ganar unes cuatro o cinco carreres, y pa ello la persona escoyida nun ye otra que Fernando Allonso. El pilotu asturianu garra'l puestu de líder del equipu de manera clara y definitiva, y l'equipu dalo a entender garrando la imaxe del pilotu asturianu pa toles estampes promocionales.

Una de les característiques más importantes del nuevu R25 ye que la casa francesa consiguió facer un motor más potente que'l que montaba'l R24. Ello nun dexa de ser un llogru técnicu a emponderar teniendo en cuenta que'l reglamentu 2005 manda que'l motor aguante dos carreres enteres, cosa que nunca pasare enantes. Ello obliga a facer motores más duros y, en teoría, menos potentes.

Con tener más caballos embaxo'l pie y con ser el favoritu de la escudería, Alonso échaseal pie de la dura realidá: ganar a Ferrari va ser mui difícil.

La web de Renault F1 yá tien tol material sobre'l coche nuevu, con datos técnicos y vídeos promocionales.