Remató la escuela "Fermín Penzol"

El director de Política Llingüística Ramón d'Andrés, el profesor de la Universidá d'Uviéu Xulio Viejo y el filólogu Xosé Nel Comba foron los representantes asturianos nel alcuentru entamáu pola Universidá de Vigo qu'esti fin de selmana debatió en Ribadeo les perspectives de la normalización del asturianu y del gallegu.

El director de la oficina de política llingüística Ramón d'Andrés asistió a la fin a la inauguración de les xornaes, marcaes pola polémica al refugar la Xunta Pola Defensa de la Llingua Asturiana y Xeira, les dos organizaciones cíviques más importantes de defensa del asturianu y del gallego-asturianu, el convite de la organización de les xornaes por considerar que les xornaes suponíen un escaparate pa defender la galleguidá del occidente asturianu.

Ramón d'Andrés, que tuvo en dulda hasta l'últimu momentu si diba participar o non nes xornaes, acudió a la fin a la xornada inaugural, na que dio un discursu n'asturianu en que se centró sobre la cuestión del gallegu-asturianu. D'Andrés defendió que la iniciativa política sobre la fala del Navia-Eo correspuénde-y a Asturies n'esclusiva independientemente de cualquier otru debate filolóxicu y alvirtió que nun diba consentir dende'l so cargu inxerencies d'instituciones de fuera d'Asturies sobre la política llingüística a siguir nel Navia-Eo, ello al empar que reclamó que nun se quixera francer dende Galicia el consensu alredor de la llingua qu'esiste n'Asturies. El titular de Política Llingüística nun respondió a entrugues nin fizo más aclaraciones, remitiéndose al discursu qu'acababa de lleer como única declaración que contaba facer.

D'otra manera, na mesa a la que taba convidada la Xunta Pola Defensa de la Llingua participó a tíulu personal y convidáu pola organización el filólogu Xosé Nel Comba, que dio una panorámica sobre l'estáu actual del procesu de normalización del asturianu, esponiendo les sos lluces y solombres dende'l so puntu de vista, rescamplando ente les primeres los avances en materia de toponimia y ente les segundes l'escasu grau de cumplimientu que se da de la Llei d'Usu y del Plan de Normalización. En representación tamién de la parte asturiana, nuna mesa sobre la normalización nel ámbitu universitariu tomó parte'l profesor de la Universidá d'Uviéu Xulio Viejo, qu'espunxo énte los sos homólogos de les universidaes de Coruña, Santiago y Vigo, y énte un auditoriu mayormente desconocedor de la situación, el revesosu procesu de xénesis de la titulación de Filoloxía Asturiana, dende l'aniciu del mesmu hasta l'allancamientu en que s'alcuentra cola llegada del espaciu únicu universitariu européu y los alcuerdos de Bolonia. Al rau d'ello, Viejo fizo tamién un resume mui críticu de la política llingüistica nos últimos años n'Asturies, centrándose sobremanera n'actuación como conseyeru de cultura de F.J. Fernández Vallina. La falta de normalización del asturianu nel sen de la institución universitaria tamién merció la crítica del profesor Viejo.