Remató en Valdés la I Escuela d’Asturianía

Acabó ayeri en L.luarca'l tercer cursu de la primer promoción de la Escuela d'Asturianía, una iniciativa del Conseyu de Comunidaes Asturianes que nació nel 2.002 col oxetivu de formar a los emigrantes asturianos de segunda y tercer xeneración en cuestiones de cultura, música, llingua y folclore asturianos col oxetivu de que se convirtieren, a la vuelta a los sos países, en tresmisores de los conocimientos alquiríos y en renovadores de la cultura asturiana, que sigue mui viva na emigración.



El plan d'estudios de la Escuela incluyía trés cursos. El primeru dióse n'Uviéu nel 2.002; el segundu l'añu pasáu en Llanes y el terceru foi esti añu en L.luarca, ello cola idega de que los cursillistes conocieren l'Asturies central, oriental y occidental. Vicente Sánchez y Alberto Rodríguez foron los codirectores d'esta esperiencia qu'entamaron 25 persones, un númberu pequeñu (y ello más teniendo en cuenta que solo terminaron 20) pero que nel que tan representaes comunidaes asturianes de munches procedencies: México, Venezuela, Chile, Uruguay, Bélxica, Francia, Madrid, Valencia, Alicante y Tarragona son los centros que tienen xente nos cursos, qu'impartieron, amás de los mesmos directores, el profesor de llingua asturiana Pablo Xuan Manzano, l'antropólogu Roberto González-Quevedo González, la profesora de llingua y lliteratura Paz Fonticiella Gutiérrez y los músicos Pedro Pangua Rivas, Flavio Rodríguez Benito, José Manuel Fernández Gutiérrez (El gaiteru Guti) y l'investigador de la tradición musical asturiana Fernando M. de la Puente Hevia.