Remata la primer selmana de los Cursos de l'Alla n'Ibias

Amediada la so quincena de duración, los cursos de branu de l'Academia de la Llingua desarróllense con normalidá, entamando mañana dellos de los cursos que más interés xeneren ente l'alumnáu, como'l de Mediu Ambiente, que va poner Carlos Lastra y que va incluyir escursiones de campu pa conocer los monumentos naturales más interesantes del occidente astur. Lo más destacao de la primer selmana foi'l discursu de la Presidenta de l'Alla Ana Cano, qu'asoleyó cuestiones ensin resolver na escolarización del asturianu.

Na so intervención la Presidenta de l'ALLA dio-yos la bienvenida a los participantes, profesores y alumnos de los XXII Cursos y darréu agradeció-yos la so presencia a les autoridaes presentes. Al actu asistieron el Conseyeru d'Educación y Ciencia José Luis Iglesias Riopedre, la Vice-Rectora d'Estensión Universitaria Paz de Andrés, l'Alcaldesa d'Ibias Nélida Fernández Barrero y el Direutor del Centru Educativu "Aurelio Menéndez" Luis Felipe Menéndez)

Darréu d'ello, la intervención d'Ana Cano centróse en delles cuestiones rellacionaes cola enseñanza de la llingua.

Polo que fai a la enseñanza non universitaria, amosó la so satisfaición pola igua de los currículos de Llingua Asturiana (Primaria, Secundaria y Bachilleratu) tanto no que se refier a los sos conteníos como a la denomación de l'asignatura, ensin dexar d'insistir na necesidá de que s'espublicen enantes del entamu del próximu cursu 2004-2005.Dempués, ente los vieyos temes pendientes que precisen una solución urxente, señaló'l de la reconocencia de la Especiálidá de Llingua Asturiana al profesoráu de Primaria y Secundaria y la necesidá d'enanchar la ufierta de la enseñanza del idioma a tolos centros educativos, incluyendo la enseñanza concertada y la privada, ensin escaecer la ellaboración de materiales pal aula, porque anque se dieron pasos nesti últimu añu nesti sen, quedá entá muncho por facer.

Polo que cinca a la Universidá, la Presidenta recordó la necesidá de la creación de la titulación de Filoloxía Asturiana, qu'agora habrá inxerise dientro del nuevu espaciu de la converxencia europea, onde la Filoloxía Asturiana, al marxe de cómo queden les demás titulaciones de Filoloxía, habrá tener el mesmu tratamientu y reconocencia llegal que les filoloxíes d'otres llingües del Estáu.

La Presidenta finó les sos pallabres manifestando que tou esti procesu de normalización y dignificación de la Llingua Asturiana sedría muncho más fácil y efeutivu si cuntáremos cola reconocencia de la oficialidá, la única presea llegal pa encontar el futuru del idioma y garantizar los derechos llingüísticos de los asturianos.