REM lleva vendíes más de 7.000 entraes

El conciertu que va dar el grupu americanu REM en Xixón el 29 de mayu lleva traza de dir a ser un ésitu. El Conceyal de Festeyos de Xixón, Iván Álvarez Raja, comentó ayeri a Asturies.com que la venta d'entraes marcha a bon ritmu. Según los datos que tenía'l responsable de festeyos, yá se lleven vendíes a falta de más de trés meses pa l'actuación más de 7.000 entraes, la metada de les previsiones coles que trabayaba'l conceyu, que contaba con despachar unes 15.000 entraes pal recital que va dar el grupu de Michael Stipe en Xixón el 29 de mayu.

De siguir asina, podría enllenase la pista de les Mestes, que tien una capacidá másima que pue llegar, en casu de ser necesario a les 20.000 persones, anque la posibilidá de llevar al grupu al estadiu de El Molinón, nel qu'entren cerca de 40.000 persones quedó descartada de mano por deséu del grupu, según esplicó Álvarez Raja. REM colgaron el "nun hai billetes" pa los sos conciertos en Madrid y Barcelona y tan vendiendo mui bien pa los trés conciertos que van llevalos a últimos de mayu per Torrevieja, Zaragoza y Xixón.