Relevu na presidencia de la Fundación “Caveda y Nava”

La Fundación Caveda y Nava llevó a efectu esta selmana'l renuevu de la so dirección, col abandonu de la mesma por parte del villaviciosín Etelvino González y la entrada nel cargu d'Inaciu Iglesias. El fundador de Les Noticies, primer selmanariu d'información xeneral n'asturianu, y autor delles obres d'ensayu sobre l'asturianismu y la historia d'Asturies llega a la dirección de la Fundación acompañáu por Rogelio Álvarez Hevia como secretariu, mientres que na subdirección caltiénse la escritora Berta Piñán, que lleva ocupando esta responsabilidá dende la creación de Caveda y Nava a primeros del 2002.

El relevu d'Etelvino por Inaciu Iglesias supón el tercer nomamientu de presidente na trayectoria de la Fundación, que tuvo por primer presidente al profesor de filoloxía José Luis Atienza Merino, quien dexó'l cargu pa que lu garrare Etelvino González, presidente tamién de l'asociación cultural d'amigos de Villaviciosa "Cubera" y persona d'importancia dientro de l'agrupación del PSOE de Villaviciosa, onde llegó a tener cargu de conceyal por esti partíu. Quien lu sustituye agora tien tamién compromisu políticu, nesti casu cola Unión Renovadora Asturiana (URAS) anque la filiación política nun foi determinante, y ello ye que la candidatura d'Iglesias a la dirección de la Fundación aceptóse por unanimidá na reunión del pasáu martes en que se renovaron los cargos.

La Fundación Caveda y Nava, que defende un consensu social de mínimos a favor del reconocimientu social y llegal de la llingua asturiana, ígüenla dende l'añu 2002 personalidaes de relevancia na sociedá asturiana. Ente los sos patronos d'honor tan Emilio Marcos Vallaure, director del Muséu de Belles Artes d'Asturies, l'antiguu arzobispu d'Uviéu, Gabino Díaz Merchán, los diputaos na Xunta Xeneral Paloma Uría (IX) Faustino Álvarez (PSOE), la Cronista Oficial d'Uviéu, Carmen Ruiz Tilve o la presidenta del PP de Xixón Pilar Fernández Pardo.