Reiniciu nel concursu al meyor cantar n'Asturianu

L'apaición de votos fraudulentos nel Conceyu Abiertu del Premiu al Meyor Cantar n'Asturianu 2004 d'Asturies.com, obliga a esta casa nun tener en cuenta y borrar esos votos.

Asturies.com comprobó estos díes que nel Conceyu Abiertu del concursu al Meyor Cantar n'Asturianu 2004 qu'organiza Asturies.com, usáronse sistemes pa mandar una gran cantidá de votos al traviés d'un programa d'unviu automáticu de votos. Con ello desvirtuáronse los resultaos xubiendo artificialmente los votos de los cantares dende un mesmu ordenador, usando pa ello sistemes que nun correspuenden cola filosofía del concursu, que nun ye otra que la de buscar el cantar n'asturianu preferíu de la mayoría de los nuesos llectores dende una perspectiva lúdica y col oxetivu d'ayudar al espardimientu y promoción de la música asturiana.

Col oxetivu de que'l concursu mantenga esa filosofía, n'Asturies.com decidimos eliminar esos votos fraudulentos y asitiar los contadores nes cifres que figuren nes copies de seguranza anteriores a la emisión d'esos votos non válidos, amestando un filtru a la votación pa mayor seguranza. Teniendo en cuenta esti reiniciu del concursu, amplíase tamién el periodu de votación hasta'l próximo xueves trés de febreru. Dende Asturies.com queremos pidir disculpes poles molesties, y animamos a tolos llectores a siguir dando la so opinión nel Conceyu Abiertu.