Refuguen estatutos por tar n'asturianu

El "Ensame pa la Oficialidá de la Llingua d'Asturies" una organización nueva que, como diz el so nome, tien por oxetivu la consecución del estatu d'oficialidá del asturianu, denunció esta selmana que la Conseyería d'Economía y Alministración Pública refugó'l rexistru de los Estatutos de l'asociación por tar n'asturianu.

El Gobiernu comunicó-y al Ensame que pue presentar los sos Estatutos n'español, gallegu, euskera o catalán, pero que nun pue facelo n'asturianu. Los miembros del Ensame dicen tener conocimientu de que l'alministración asturiana ta dando de pasu estatutos fechos sólo n'asturianu por otres asociaciones. L'Ensame diz que fizo entrega a la Oficina de política Llingüística del escritu en que se-yos negaben los estatutos n'asturianu. Xunta esto, l'Ensame entregó tamién un tacáu de señales viales colos topónimos n'asturianu, entendiendo que la permanencia d'estos carteles supón que nun se cumple colo que manda la Llei d'Usu del Asturianu del 98. Nel comunicáu en que da anuncia d'estos asuntos, l'Ensame tien pallabres crítiques pa cola Conseyera de Cultura Ana Rosa Migoya por negar, en plena Selmana de les Lletres Asturianes, la posibilidá de declaración d'oficialidá del asturianu