Refuga unánime del ecoloxismu asturianu al depósitu de basa na mina d’oru de Balmonte

La Coordinadora Ecoloxista Asturiana y Ecoloxistes n'Acción tan en contra del proyectu de Río Narcea Gold Mines pa un segundu depósitu de basa contaminao nes sos instalaciones asturianes. La Coordinadora tien denunciaes les obres del banzáu.

Dempués de la denuncia énte la opinión pública, los ecoloxistes asturianos pasaron a l'acción contra l'última acción de la polémica empresa minera canadiense. La Coordinadora Ecoloxista dio anuncia ayeri de que presentare denuncia na Casa Conceyu de Miranda y na Viceconseyería de Mediu Ambiente a la empresa Río Narcea Gold Mines (RNGM) pola construcción ensin permisu d'un banzáu pa echar nelli basa contaminao de los procesos de llimpieza del oru. Según el grupu que representa Fructuoso Pontigo, el depósitu fízose ensin les llicencies obligatories del Conceyu y del Gobiernu asturianu. Los ecoloxistes dicen que anque'l Principáu llegó a entamar n'ochobre la tramitación del proyectu, la empresa fizo la obra ensin disponer de la llicencia, y acusen a la empresa de presumir d'ello públicmente y d'amenazar al traviés de los medios de comunicación de que peligraben 196 puestos de trabayu si un se facía'l banzáu, en referencia a delles informaciones qu'apaecieron esti fin de selmana nos periódicos asturianos.

Esti segundu banzáu va ser al paecer de los ecoloxistes más peligrosu que l'anterior, ello en cuantes que la basa contaminao con cianuro y metales pesaos va posase esta vuelta nun depósitu que va tener menos estabilidá xeolóxica que'l primeru. Según la Coordinadora, mientres el primer banzáu s'asitiaba en piedra cuarcítica impermeable, esti segundu depósitu de basa va asitiase nuna zona de roca caliza poroso que pue dar llugar a filtraciones a llargu plazu que llegaríen a contaminar los acuíferos del llugar. El grupu Ecoloxistes n'Aición d'Asturies tamién ye d'esta mesma opinión y sorraya la esistencia d'un manantial que se desvió pero que en faciéndose'l depósitu de basa, va buscar la so salida natural pel mesmu llugar. Nesti sentíu, y precisamente pol efectu que va facer la fuerza del agua, la propuesta de la empresa d'aisllar el banzáu con una capa d'arcilla y otra de polietilenu abúlta-yos a dambos colectivos mui cuestionable, sobremanera teniendo en cuenta qu'ha llegar el día en qu'escose la mina d'oru y la empresa dexe'l llugar, colo que se van controlar menos les instalaciones.