Refrescos y política

Va dellos mesucos, el mundu conoció l'apaición d'una Coca cola musulmana. Baxo'l nome de Mecca-Cola, la iniciativa d'un emigráu arxelín en Francia de facer una gaseosa alternativa a la de la multinacional americana acabó cuayando en ventes y popularidá, sobremanera ente la población musulmano. La Mecca-Cola, que pue conseguise n'Asturies dende'l mes pasáu na primer carnicería halal del país asitiada en Xixón, tien por bandera que parte de los beneficios de la empresa van pa financiar proyectos humanitarios en Palestina.

Ello ye que tres la popularidá del precedente franco-arxelín apaecieron nuevos sucedánios del orixinal, y asina llegaron a les baldes de les tiendes britániques la Qibla-cola y nel Irán la Zam-Zam Cola. La última en xuntase al grupu de competidores ye la Cola Turka, un refrescu que ta baltiando les ventes de Coca Cola en Turquía aprovechando l'afoguín patrióticu y antiamericanu que-yos salió a los turcos nos díes del ataque a Iraq. La cosa métese pela política más de lo que parez, y ye que'l distribuyidorde Cola Turka nun ye otru que'l fíu del primer ministru turcu, Tayyip Erdogan. Entovía más, quien lleva la representación de la rival americana en Turquía ye l'ex-primer ministru, Mesut Yilmaz.