Recurren in extremis el Plan de la Costa Asturiana

La Coordinadora Ecoloxista d'Asturies presentó ayeri recursu de reposición énte l'aprobación definitiva del Plan Territorial d'Ordenación del Litoral Asturianu (POLA). La organización ecoloxista xustificó la presentación del recursu pola presión que sufre la costa asturiana por culpa de l'actividá constructiva, que diz que va xubir según echen a andar tramos nuevos de l'autovía del Cantábricu.


El recursu tiense en dellos puntos, en primer llugar la omisión que los ecoloxistes dicen que se fexo de les entidaes ecoloxistes nel procesu de redacción del plan, nel que per se sintieron les opiniones de los conceyos afectaos y los empresarios turísticos y constructores, mientres que les alegaciones de la Coordinadora quedaron ensin rempuesta. La Coordinadora atéchase na Llei 30/1992, que diz que quien presentare alegaciones o observaciones en trámite d'información pública tien derechu a una rempuesta razonada de l'alministración.


D'otra manera, la Coordinadora diz nel recursu que'l POLA nun ye más qu'un "instrumentu de fomentu turísticu qu'aporta poco a la ordenación territorial y ambiental preexistentes, coles qu'incluso entra en contradicción y resulta regresivu en cuantes a niveles de protección, conservación y restauración del espaciu". Ello espeyaríase pa la Coordinadora en que'l Plan nun acuta limitaciones nos usos d'espacios protexíos nin da propuestes pa l'ampliación d'estos espacios nin pa los terrenos qu'atiesten colos espacios non urbanizables, lo que pue llevar nel futuru a la esistencia d'urbanizaciones masives dende la mesma raya de los 500 metros de la oriella del mar qu'acuta'l plan y campos de golf dientro d'esa raya de 500 metros.

La previsión que se fai en POLA d'una bayura d'obres a lo llargo de tola costa como los parques-playa, caminos pioniles o aparcaderos, ye otra de les condenes de la Coordinadora, que diz qu'ello va escontra la Directiva 2001/42, relativa a la evaluación de los efectos de planes y programes nel mediu ambiente, esistiendo una instrucción del añu 2004 anterior de l'aprebación del mesmu POLA que manda facer un Estudiu de Diagnósticu Ambiental que nun s'espeya en Plan.