Recuérdase la figura de Torner con un musical

Ente la riestra d'eventos que tán faciendose anguaño con motivu de los cincuenta años de la muerte d'd'Eduardo Martínez Torner, estrenase esti sábadu 26 un musical basáu na herencia del musicólogu asturianu.

El musical yá dexa claro nel so títulu a quién quier facer un homenaxe, "Torner". Según los sos organizadores, esta obra estructurada en cuatro partes, "de romería", "de filandón", "de boda" y "vaqueires", quier "ilustrar la riqueza de la música tradicional asturiana recoyida y documentada por Eduardo Martínez Torner a primeros del sieglu pasáu pretendiendo amosar tamién la so importancia na actualidá y nel futuru de la música y cultura d'esta tierra", como comenten dende CAE (Compañía Asturiana d'Espectáculos), productora del espectáculu. Les voces principales del musical son Anabel Santiago y Alberto Varillas, cuntando cola collaboración de los hermanos Marisa y Santiago Valle Roso. Los músicos qu'acompañen a estes voces van ser son Manuel Cordero nes percusiones, María Álvarez curdión, Michael Lee Wolfe, baxo y mandolina. La obra va ser presentada pol escritor Ismael Arias.

Pa ver la obra namás qu'averase hasta'l Conservatoriu "Eduardo Martínez Torner" (C/ Corrada del Obispo) d'Uviéu'l próximu sábadu 26 de febreru, a les 19,00 hores, la entrada ye de baldre.