Recorte na producción de petroleu

La OPEP nun fizo casu a presiones y entamó una nueva baxada de la producción de crudu. Dende la selmana pasada prodúcense un millón de barriles menos,lo que caltién la cotización penriba los 30 dólares barril. Asina, la inflación ta convertiéndose en dellos países nuna amenaza real. Nel mercáu bursátil internacional el bon datu de desemplegu de los Estaos Xuníos animó a la comunidá inversora. Esta bona anuncia del otru llau del Atlánticu tamién tiró p'arriba pel Ibex asitiándose penriba la cota sicolóxica de los 8.000 puntos.

El bon datu de desemplegu nos Estaos Xuníos foi la meyor anuncia de la selmana en munchu tiempu. La creación de 308.000 emplegos cuando los analistes contaben con 120.000 tiró de tolos mercaos p'arriba. Tamién nos Estaos Xuníos, la tasa de desemplegu algamó'l 5,7% y les ganancies medies por hora tuvieron una xuba del 0,1%. Na Xunión Europea, el datu de precios de la producción nun varió mentanto que'l datu de producción industrial nel Estáu Español tuvo una xuba del 2%.

Los datos del mercáu llaboral d'Estaos Xuníos prestáron-yos a los inversores. Asina l'índiz Dow Jones de Wall Street tuvo'l vienres un pieslle nos 10.381,70 lo que ye una xuba del 0,50% y el tecnolóxicu Nasdaq trancó nos 2.000,63 puntos (+0,40%). Nel Vieyu Continente l'índiz alemán Dax tuvo una xuba penriba'l 2% y Llondres, París y Milán tamién pesllaron en positivo.

L'Ibex-35 entamó un nuevu periodu de xubes sofitáu nos 8.000 puntos. El vienres pasáu'l selectivu Ibex algamó los 8.269,7 puntos lo que supón una xuba nel conxuntu de la selmana del 4%, el meyor resultáu dende abril del 2003. Pero lo más importante foi'l volume de negociu: 4.399 millones d'euros, el quintu más importante na historia de la bolsa madrilana. Los blue chips del mercáu foron los que más xubieron, casu de BBVA, SCH, Banco Popular, Acerinox, o Amadeus. El Grupu Telefónica tuvo una bona selmana tres les xubes de la matriz. Ente les perdes destacó la constructora Sacyr Vallehermoso.

Anque la OPEP baxó la producción, el preciu del petroleu tuvo una pequeña cayida la selmana pasada. Asina, el preciu del barril Brent asitióse'l vienres nos 30,40 dólares poles duldes de que se fuere a cumplir l'alcuerdu de la OPEP. Pa entamar Noruega ya dio anuncia de que nun va cumplir cola baxada de la producción. Xunta esto Estaos Xuníos dio anuncia tamién de que tien la reserva enerxética más grande dende hai añu y mediu. Arxelia, Libia, Arabia Saudí y Venezuela son los países de la organización de productores que más interés tienen na xuba de del petroleu.

L'oru cayó la selmana pasada'l 1% hasta los 421 dólares onza. De toles maneres llegó a algamar máximos selmanales non vistos en 15 años. Otramiente, nel mercáu de renta fixo los bonos tuvieron una permala selmana anque´l bonu de referencia, el bund alemán, caltuvo la rentabilidá nel 4,06%. La decisión del presidente del BCE, Jean Claude Trichet, de nun ceder a les presiones d'Alemaña y Francia pa baxar los tipos y les anuncies de los bonos datos d'Estaos Xuníos tiraron pelos precios de los bonos p'abaxo. L'euru tuvo una selmana tranquila mangándose nel cambéu de 1,2318 unidaes dólar.