"Recorded live in Asturies"

La escena del discu non oficial o "bootleg", como se-yos conoz n'inglés a estes grabaciones feches por medios dacuando poco ortodoxos, recueye dellos conciertos de grandes artites que vinieron a Asturies, muncho podemos topalos per internet.

Asturies vien siendo dende primeros de los años 90 l'escenariu de conciertos de grandes estrelles internacionales de la música. Xente como los Dire Straits, David Bowie, los Rolling Stones, U2, Elton John o Bruce Springsteen tienen pasao per Asturies a lo llargo d'estos años poniendo les ciudaes asturianes, sobremanera Xixón, nel calendariu de les grandes estrelles del pop y del rock.

La escena del discu non oficial o "bootleg" como se-yos conoz n'inglés a estes grabaciones feches por medios dacuando poco ortodoxos y asoleyaes por cases de discos de nomes exóticos nun foi ayena a esti fenómenu, y asina, restolando pela rede ye fácil alcontrar a la venta bien de discos que recueyen otros tantos directos míticos. Reculando nel tiempu hasta 1990, el conciertu de David Bowie nel Molinón tien la so grabación particular, lo mesmo que la de los Deep Purple na Plaza de Toros de Xixón del 1993.

Les dos actuaciones de Bruce Springsteen nel mesmu escenariu d'El Molinón son un clásicu nel mundu del discu "bootleg" y asina ye fácil alcontrar referenciesa al conciertu del añu 1993 y el que dio nel añu 2003 del que puen baxase incluso la portada y contraportada del CD y sentir una amuesa del conteníu.