Reciella homenaxa a la familia Barbón

El X Día de la Reciella, que va tener llugar el sábadu 7 d’ochobre nel Muséu del Pueblu d'Asturies, recupera la carrera ‘Entaína’, na qu’una familia pasa de manera simbólica ente los sos miembros el testigu que simboliza la tresmisión xeneracional del asturianu. ‘Reciella. Families pol Asturianu’ homenaxa nesta ocasión a la familia Barbón, de Llaviana.

Yá principió la cuenta atrás pa la celebración del Día de la Reciella, una de les xornaes más esperaes del añu qu’esti añu ye más especial por vivir el so décimu aniversariu baxo’l lema ‘La familia del asturianu crez’. Una escusa perfeuta pa recuperar la carrera familiar pol asturianu ‘Entaína’, un pequeñu percorríu pel recintu museísticu aptu pa toles edaes que dexara d’entamase por mor de la pandemia de COVID-19.

Y como n’ocasiones anteriores, una familia va ser homenaxada, algamando esti honor la familia Barbón, de Llaviana. De güela, Victoria, a nietes, Emma y Vera Barbón, pasando pel fíu y padre, Loi Barbón.

Música, teatru, baille, deporte, cosplay, xuegos, moda, gastronomía y tiendes d’aire, actividaes toes elles n’asturianu, van animar el día dende les 11 hores, con entrada llibre. Una xornada pa vivir en llingua asturiana dafechu ente familiares y collacios.

‘Reciella. Families pol Asturianu’ va dir anunciando’l programa concretu nos díes próximos. Una de les novedaes va ser un taller d’origami, téunica xaponesa pa facer figures con papel, a cargu d’Inari Gauken, escuela de llingua y cultura del país nipón que ta acabante d’abrir les sos puertes en Xixón.

Na semeya, los Barbón [que nun son familia (directa) del presidente Adrián Barbón, tamién llavianés].