Reblagu del paro

Si pel veranu los responsables del Ministeriu de Trabayu y de la Conseyería de Trabayu s'engarraben por repartise los galones de la baxada del paro, que llegó a tar en 47.700 persones n'agostu, el datu del mes d'ochobre vuelve a pintar en negro la situación del mercáu llaboral n'Asturies, que rexistró 1712 persones más apuntaes a la llista'l paro, un 3,43% más que nel mes de setiembre y dos décimes penriba de la media estatal hasta quedar el total en 51.723 El pesimismu qu'arreciende'l datu del Inem concueya col escuru panorama que pinta l'informe de la Sociedá Asturiana d'Estudios Económicos. El SADEI ta acabante tamién d'espublizar l'informe de coyuntura del mes de setiembre, que conclúi qu'Asturies tien nesti momentu la creación d'emplegu más baxa dende va cinco años. L'informe de la prestixosa entidá reconoz que, tres d'una temporada turística tan probe como la d'esti añu, la feble tendencia a la creación d'emplegu acabó por cayer Otramiente, la producción industrial caltiense como taba, mientres que'l consumu particular baxa. Tamién s'apunta que la construcción ye de los pocos pegoyos que tienen pola economía del país, como amuesa'l datu de que se vendiere un 36% más de cementu.