Reacciones al Plan de la Xunta de Galicia sobre normalización nel Navia-Eo

Reacciones pa tolos gustos tres de la rueda de prensa que dio ayeri l'Academia de la Llingua na que la institución que dirixe Ana Cano denunció la esistencia d'un plan de normalización llingüística de la Xunta de Galicia que preve actuaciones nel Navia-Eo.

Dende la Oficina de Política Llingüística, el so titular Ramón d'Andrés quíta-y fierro a la trescendencia na práctica del plan gallegu de normalización pero echa pela Academia por "crear una polémica irreal". Ramón d'Andrés declaró a Asturies.com que'l so departamentu "nun tenía notificación oficial" de la esistencia del plan gallegu de normalización, pero aclarió que la política llingüística nel Navia-Eo ye "competencia esclusiva del Gobiernu asturianu", que la exerce al traviés de les conseyeríes de cultura y educación, polo que cualquier midida a aplicar na zona namás pue proponela y executala'l gobiernu asturianu, colo que la posible impartición de gallegu nes escueles y institutos eonaviegos ye "impensable".

D'Andrés acusó a l'Academia de la Llingua, qu'ayeri destapó l'asuntu énte los medios de comunicación, de crear una "polémica irreal" y alertar d'un "peligru ficticiu" al armar un espolín por un plan que nun tien posibilidá real d'aplicase n'Asturies y dixo que "en cualquier casu, l'Academia de la Llingua, qu'ayeri pidía la intervención del Gobiernu asturianu nel tema, nun ye la institución con más autoridá pa ello, en cuantes que, dende l'ocho de febreru d'esti añu, l'ALLA tien vetada a la Conseyería de Cultura, que ye parte d'esi gobiernu al que-y pide agora que tome cartes nel asuntu". D'otra manera, d'Andrés amestó que "si la directiva de l'Academia de la Llingua tuviere voluntá real d'entendimientu col Gobiernu asturianu, que nun la tien, yá taríen informaos de los términos en que ta redactáu'l Plan de Normalización Llingüística d'Asturies, que ta p'aprobase d'equí a poco y que contempla una llinia d'acción específica pal Navia-Eo paralela a la que va facese pal asturianu".

Representantes de la Xunta Pola Defensa de la Llingua Asturiana contactaos por esti mediu declararon que la Xunta nun cuenta con facer valoración pública sobre esti plan, mientres que pela parte afectada xeográficamente pol plan de normalización de la Xunta de Galicia, representantes de l'asociación Xeira, defensora de la necesidá de que'l gallego-asturianu se normalice dende unos criterios propios, esplicaron qu'entovía taben estudiando'l documentu de la Xunta de Galicia y que yera ceo pa emitir una valoración.

Quien sí qu'emitió valoración foi bona parte del asturianismu políticu. Asina, Andecha Astur emitió un durísimu comunicáu en qu'esixe la oficialidá nel so territoriu de los que consideren "variantes llingüístiques del asturianu" y acusa al Gobiernu IU-PSOE "de facilitar los enfotos colonizadores que'l Plan de Normalización del Gallegu presenta sol occidente d'Asturies" esixéndo-y al Gobiernu asturianu que demande una rectificación de la Xunta de Galicia por querer "llantar el gallegu nel enseñu y na vida social" nos conceyos del Navia-Eo.

Pela so parte, Izquierda Asturiana (IAS) tamién se posicionó contra'l documentu de la Xunta de Galicia y cargó contra'l Gobiernu asturianu. Según IAS, "la inoperancia del executivu asturianu en materia llingüística dexa'l campu llibre a intromisiones como'l plan de normalización gallegu, dándo-yos una coartada y escusa perfecta a ciertos sectores del espansionismu gallegu que, emplegando l'argumentu de la pertenencia del Navia-Eo a un mesmu dominiu llingüísticu, intenten imponer les sos polítiques confundiendo filoloxía con nacionalidá". IAS llama al Gobiernu asturianu a desarrollar una política llingüística activa na zona y llamenta los términos agresivos que gasta'l documentu gallegu, onde se fala de "provincia de Oviéu" que tienden a separtar, en cuenta d'unir,a dos pueblos vecinos y hermanos.