Reacciones al alcuerdu

Mientres la Xunta Xeneral del Principáu escenifica güei la sesión d'investidura d'Álvarez Areces como presidente del Principáu pa otros cuatro años, los términos del alcuerdu de gobiernu ente'l partíu del presidente y Izquierda Xunida - Bloque por Asturies siguen dando tema de conversación y provocando reacciones d'instituciones y personaxes públicos. Si ayeri yera la Xunta Pola Defensa de la Llingua la qu'echaba pel alcuerdu (ver noticia más p'abaxo) güei yeren destacaos miembros de l'Academia de la Llingua Asturiana los qu'opinaben sobre l'alcuerdu pol que va mandase la política llingüística d'Asturies d'equí a la vuelta de cuatro años.

El que fore primer presidente de l'Academia y fundador de Conceyu Bable, Xosé Lluis García Arias, quexose de que'l documentu namás ye una llista de propuestes que nu comprometen a naide y nes que se pon como llogru lo que nun ye otro qu'una previsión llegal que nun se cumplía primero. Polo tanto, l'alcuerdu vendría a da-y carta de validez a la conducta del PSOE y amás vendría poner como concesión lo que vieno desarmándose nestos años últimos.

La decepción col alcuerdu compártela tamién Xosé Antón González Riaño, profesor de maxisteriu y miembru de l'Academia de la Llingua. Pa Riaño l'alcuerdu falla en cuantes que fala de puestos a repartir primero que de programa y comete l'error d'estremar la política a siguir en conceyos de la política p'Asturies. Otru tercer fallu, entovía más gordu, sedría'l que IX-BPa nun consiguiere la Conseyería de Cultura, porque agora l'organismu encargáu de facer política llingüística queda en manes d'una conseyería remanada pol PSOE, lo que ye, al paecer del miembru de l'Academia, "dexar les pites al cargu del raposu". Políticamente, Riaño ve mal l'alcuerdu en cuantes que dexa al Bloque por Asturies, posible guañu d'un polu asturianista mayoritariu, en precario y ensin nada qu'ufiertar.

Dende'l Bloque por Asturies, destinatariu de toles crítiques, Rafael Palacios dixo qu'asumen qu'esti foi un alcuerdu de mínimos y pidió comprensión en cuantes que se partía d'una posición de clara debilidá na negociación. Sobre les crítiques de la Xunta y de l'Academia, Rafael Palacios esplicó qu'asumen y faen propies les crítiques d'estes dos entidaes "de referencia" y pidió tiempu pa ver como se desarrolla l'alcuerdu, anque refugó les critiques descalificatories d'organizaciones polítiques "que nunca nun movieron un deu". Palacios esplicó qu'en nengún momentu van renunciar a la meta de la oficialidá y esclarió que cola firma del alcuerdu nun acaba la pólvora.

El representante del BPA quixo destacar que l'alcuerdu inclúi un desarrollu reglamentariu de la Llei d'Usu que pue dar munchu xuegu y anunció qu'una de les mayores preocupaciones agora ye ver que persones van ocupar los cargos previstos. Otramiente, pa Palacios ye importante qu'esta seya la primer llexislatura onde la llingua dexe d'identificase con una corriente ideolóxica concreta y s'afite como llingua institucional al través de la esistencia de cargos públicos que la empleguen como llingua vehicular.