Reacciones a la sentencia de Llangréu

La sentencia del Tribunal Superior de Xusticia d'Asturies retirando cautelarmente la declaración d'oficialidá del asturianu nel Conceyu de llangréu yá ta alcontrando la rempuesta de les organizaciones asturianistes polítiques y culturales.La Xunta Pola Defensa de la Llingua Asturiana emitió ayeri una nota en que afirmaba que "Les declaraciones d'oficialidá nos conceyos respuenden a una demanda social de dotar de conteníu real al artículu 4 del Estatutu d'Autonomía" pa la Xunta, estes declaraciones, "Lloñe de ser ideales, dan una cierta cobertura normativa pa encaxar midíes d'afondamientu na normalización social del asturianu" xera en que, al paecer de la Xunta, taba avanzándose seliquino en Llangréu. La organización emata'l so comunicáu calificando l'anulación de "actu deliberáu y inxustificáu de violencia" y anunciando que "va usar tolos calces que crea convenientes pa denunciar la conculcación de los derechos de los qu'Asturies ta siendo víctima"Pela so parte, el Bloque de la Izquierda Asturiana, organización mui asentada nel conceyu llangreanu, califica la sentencia de antidemocrática e intolerante. El BIA píde-y al Ayuntamientu que "nun tenga en cuenta" la sentencia y que "muestre públicamente'l so rechazu a esta inxusta decisión"Otra organización que nun tardó en responder a la sentencia foi Izquierda Asturiana. El partíu nacionalista va más allá na so crítica y diz qu'esta sentencia crea un marcu "d'indefensión total y de represión xudicial que pon a los falantes d'asturianu nun de los peores momentos dende la transición", y esixe una depuración de responsabilidaes nel Gobiernu Asturianu, qu'entame col cese fulminante del Conseyeru de Cultura. Finalmente, IAS ve la declaración inmediata d'Oficialidá como única salida pa esti procesu

Contador Estadistiques