Reacciones a la crisis na política llingüística de Xixón

La dimisión en bloque la selmana pasada del Conseyu Asesor de la Oficina de la Llingua de Xixón, en protesta pola probetaya política normalizadora del conceyu y pola non aprobación de les prometíes ordenances d'usu del asturianu, provocó reacciones en cuasimente tol arcu políticu de la ciudá.

IX-BA, una de les formaciones en gobiernu del conceyu de Xixón y, polo tanto, destinataria de les crítiques de los representantes que denunciaron la "nula voluntá pola normalización del asturianu" de la coalición PSOE-IX-BA, declaró nun compartir los motivos de los dimisionarios, declarando'l so portavoz Jesús Montes Estrada que la dimisión abultába-y "poco valiente" mientres que la conceyala responsable de temes de llingua y cultura asturiana Carmen Rúa llamentó que "se meta nel mesmu sacu a PSOE, PP y IX".

Pela parte del únicu grupu opositor na casa conceyu, el PP, el so portavoz Manuel Pecharromán declaró que la dimisión del conseyu asesor yera otra muestra del fracasu del gobiernu que "prometió coses que nun cumplió" en materia de normalización.

Yá dende fuera del edificiu de la Plaza Mayor, la Unión Asturianista (PAS-URAS) emitió un comunicáu en qu'interpreta la dimisión en bloque del Conseyu Asesor como una muestra más del "fracasu" de la política llingüística y del "fraude y l'engañu" que cometió IX colos ciudadanos nesta materia.

Izquierda Asturiana de Xixón tamién emitió un comunicáu de prensa en que se solidariza colos representantes dimitíos y nel que pide esplicaciones a la conceyala Carmen Rúa, de la que diz que "nun sabe facer el so trabayu" y que "esta ciudá nun la merez" llamentando la cuasi inexistente presencia del asturianuna Gaceta de Xixón, l'usu nulu de la toponimia oficial del conceyu" o la falta d'aprobación de les ordenances d'usu.