Ramón Lluis Bande adapta cinematográficamente a Mus

El próximu 14 de febreru sal a la cai'l DVD "Divina Lluz", un mecigayu de documental, video musical y cine de ciencia ficción, too cola música de "Mus" como base y xustificación de la obra.

Esti DVD, editáu pola casa de discos Acuarela, nun se centra nel grupu nin tampoco especialmente na so música, como comenta'l director del DVD, " ye un documental del discu de "Mus", pero non un documental nel que se ve al grupu ensayando y grabando los cantares. Non. Ye un documental de lo qu'hai detrás d'eses cantares. Del ambiente social y emocional nel que nacieron". El testu, la narración de la historia, cuerre a cargo de la voz de Mónica Vacas (cantante de Mus") y los ambientes musicales tán compuestos por Fran Gayo (miembru de "Mus"), a los que se-y amiesta'l soníu directu de cada secuencia. En dalgunos momentos de la cinta'l grupu apaez en pantalla tocando les cantares, reivindicando de manera clara'l so papel como narradores del filme. Na película escúchense, por este orden: "Na esplanada", "A la fonte cada mañana", "Divina lluz", "Sola", "Escuela cruda", "Con un calendario na mano", "La vuelta", "A la xenra blanca" y "Déxame pasar".

Amás la edición en DVD ta acompañada por otros materiales complementarios d'interés como "Rúa", un cortometraxe documental que recueye la grabación del cantar que pieslla'l discu de "Mus", "Adiós". Nél el teóricu llibertariu y caderalgu de filosofía José Luis García Rúa graba'l recitáu del so poema: "Adiós Gijón, adiós". Amás nel DVD tamién topamos "L'aire les castañes". Mediumetraxe de ficción que Ramón Lluís Bande rodó pa TVE-Asturies na que la banda sonora ta compuesta por Nacho Vegas y amás de "Al debalu", clip musical de la canción del mesmu títulu.