Ramón d'Andrés quier llograr "la dignificación social del asturianu"

La Conseyera de Cultura, Ana Rosa Migoya y el Conseyeru de Xusticia García Valledor asistieron ayeri al actu de presentación de Ramón d'Andrés como Director de la nueva oficina de Política llingüística, enxerta a la Dirección Xeneral que lleva Carlos Madera, quien tamién tuvo nel actu.

La Conseyera de Cultura dixo qu'esti nomamientu ye parte del cumplimientu del alcuerdu de gobiernu y espresó que l'espiritu d'esi alcuerdu pasa por que l'asturianu dexe de ser motivu de confrontación y política, poniendo en primer términu les midíes de protección y promoción. En representación d'IX, García Valledor fizo una declaración asemeyada a la de la Conseyera y espresó amás la so voluntá de que'l PP participare tamién na protección de l'asturianu. Pela so parte, les primeres pallabres de Ramón d'Andrés foron tamién pa espresar que l'asturianu tien de dexar de ser motivu d'enfrentamientu. El nuevu Director espresó que "la llingua asturiana tien que ser un espaciu de llibertá y tolerancia y enxamás motivu de enfrentamientu. Eso ye lo que la sociedá nos pide y prométo-yos trabayar por ello". Ramón d'Andrés tamién espresó que yera preciso que la llingua nun se viere siempre rellacionada con ideoloxíes innecesaries.

Ramón d'Andrés definió'l llabor que cuenta con sacar alantre como'l de la dignificación social del asturianu al traviés d'oxetivos realistes que preparen el camín pa una futura oficialidá, anque de momentu esta nun s'espeye nel alcuerdu de gobiernu. P'algamar estos oxetivos realistes, d'Andrés propón como base'l Plan de Normalización Sociollingüísticu, que se comprometió a presentar enantes de qu'acabare esti cursu políticu, ello ye, enantes del veranu del 2.004. Ente les llinies mayestres del plan, d'Andrés apuntó trés d'elles, como van ser la modificación de los curricula, l'actuación en toponimia, afalar el so usu nos medios de comunicación y la normalización n'alministracion. Según reconoció d'Andrés, nesti llabor van ser precises la collaboración de l'Academia de la Llingua Asturiana y de la Universidá d'Uviéu.

La Conseyera de Cultura reconocíó que la Oficina de Política Llingüística entovía nun tien presupuestu asignáu, anque esplicó que va enxertase una dotación pa ella nos presupuestos xenerales d'esti añu, qu'entovía tan en preparación