Ramón D’Andrés: “Tengo esperanza de que nesta llexislatura haya avances col asturianu”

Ramón d’Andrés, presidente de la Fundación Caveda y Nava, asegura tar esperanzáu sobre posibles avances col asturianu nesta llexistlatura. El profesor universitariu considera necesario nun quedar namái na Llei d’Usu y reclama dir más allá.
 
“Nestos momentos, tolos grandes partíos lleven la llingua asturiana nel so programa eleutoral de dalguna manera. El partíu ganador, Foro Asturias, tamién inclúi l’asturianu de forma positiva”, señala D’Andrés en referencia a la propuesta de la formación de Francisco Álvarez-Cascos de desarrollar dafechu la Llei d’Usu y Promoción del Asturianu. “El so cumplimientu ye un avance importante, anque pue vese insuficiente”, continúa’l presidente de la Fundación.
 
Nel cartafueyu qu’esta entidá que busca un consensu na sociedá asturiana alredor de les llingües del país unvió a les formaciones polítiques principales que presentaron la so candidatura a la Xunta Xeneral, destacábase que lo primero qu’habría que facer yera cumplir una Llei d’Usu “que supunxo un avance significativu nel so día” y que foi “denigrada por un seutor mui grande del asturianismu que veíala como una tapadera de non cooficialidá”. Al respeutu de la Llei, que nun se cumple y que ye desconocida por un porcentaxe mui altu de la sociedá asturiana, el presidente de la Fundación ve tres problemes: que ye una norma fecha pa velar polos derechos de los ciudadanos y mui pocos ciudadanos acuéyense a ella; la esistencia d’una indefinición, una incertidume absoluta, cuando la xente s’acueye a ella; y les interpretaciones distintes que los xueces faen de la norma.
 
Pa terminar, D’Andrés apunta que la Fundación que preside –que cuenta con miembros destacaos na Xunta Xeneral– demanda a les fuercies polítiques “avanzar hacia fórmules asturianes válides de cooficialidá y la equiparación llegal de toles llingües d’Asturies”. Nesi sen, asegura tar esperanzáu de que nesta llexislatura “haya avances col asturianu”. Mentes, no que respeuta a la toponimia, el profesor titular de Filoloxía Asturiana y Española na Universidá d’Uviéu considera que ta too “mui encarriláu depués de dos llexislatures” y confía en que termine l’aprobación de decretos nesta que principia agora.