Ralf Dahrendorf, premiu Príncipe d’Asturies de Ciencies Sociales

El sociólogu anglo-alemán Ralf Dahrendorf ganó ayeri'l Premiu Príncipe d'Asturies de Ciencies Sociales, imponiéndose nes votaciones finales a la Premiu Nobel de Medicina Rita Levi-Montalcini, al semiólogu búlgaru Tzvetan Todorov y al filósofu alemán Rüdiger Safranski.

L'acta del xuráu, presidíu pol políticu Manuel Fraga Iribarne, empondera la "contribución a les Ciencies Sociales" del premiáu pero tamién el so esmolecimientu "por una Europa basada nes sociedaes abiertes y cosmopolites" na que "enraigonen y se defendan los derechos y llibertaes dientro d'un nuevu orde internacional, que garantice la estensión universal de les oportunidaes vitales" y "nuna democracia afitada nel derechu y la xusticia". Director de la London School of Economics and Political Science y decanu del Anthony's College de Oxford, Ralf Dahrendorf tien asoleyaos bien de llibros y artículos sobre la sociedá europea contemporánea y sobre Europa y l'estáu del bienestar, ocupando cargos como diputáu del Parlamentu alemán y como comisariu de la Unión Europea.