Rajoy nun entra en dar detalle sobre la Gürtel

El presidente del Gobiernu estatal intervino nel Plenu estraordinariu del Congresu sobre esti casu de corrupción qu'afeuta al so partíu por esixencia de la oposición.

Nos 30 minutos que duró'l so discursu, Mariano Rajoy evitó nomar Gürtel nin casos de corrupción o asuntos venceyaos qu'afeuten al Partido Popular (PP). Por contra, acusó a la oposición d'ocupase en solicita-y responsabilidaes polítiques cuando hai temes, na so opinión más importantes, como'l tema catalán o'l terrorismu yiḥadista.

D'igual forma, retó a los grupos políticos a qu'entamaren una moción de censura nueva tres los ataques que recibió de les formaciones contraries a la so xestión.