Rafael Palacios tensa la cuerda cola Universidá

El Director Xeneral de Cooperación del Principáu d'Asturies Rafael Palacios convocó güei una rueda de prensa estraordinaria pa dar anuncia de la molestia del departamentu que dirixe cola Universidá d'Uviéu. El motivu d'ello nun ye otru que'l fechu de que la institución académica se negare por dos vegaes a almitir a trámite la tésis doctoral del historiador Faustino Zapico, quien presentare la memoria-resumen de la mesma n'asturianu.

Recuperando una frase del ministru de defensa José Bono na que dicía que tolos españoles nacíemos iguales en derechos, el director de Cooperación esplicó que tal paecía que los asturianos nacíemos con un derechu menos nel asuntu de la llingua. Énte lo que calificó como un "grave ataque contra los derechos lingüísticos de los asturianos qu'amás vien a dase nun momentu en que ta acabante d'aprebase un plan autonómicu de normalización" Rafael Palacios señaló que'l departamentu que dirixe nun va quedar paráu, anunciando como primer midida de protesta l'ausencia del mesmu Palacios y del conseyeru Javier Valledor a la clausura del master de cooperación que desarrolla l'Axencia de Cooperación y Desarrolu en collaboración cola Universidá d'Uviéu. El Director de desarrolu reservóse esplicar si hai más midíes de protesta previstes, pero anunció l'apertura d'un periodu de reflexón nel que Cooperación va plantegase si paga'l tiru collaborar en programes de formación en derechos humanos con instituciones que nun los respeten.

Centrando la crítica na persona del Rector Juan Vázquez, col que Palacios diz que va pidir una entrevista, el Director de Cooperación declaró que Vázquez nun pue atechase en que nun depende del Gobiernu asturianu pa desentendese de les polítiques de normalización en cuantes que los derechos llingüísticos reconocíos pola Unesco tendríen de ser d'aplicación tamién na Universidá a la hora d'aceptar una memoria de tesis doctoral n'asturianu, independientemente de que la llingua sía oficial o non.