Rafael Palacios acusa a Jesús Iglesias d’enclicase “énte les mentires del PSOE sobre la imposición del asturianu”

Les declaraciones que fizo ayeri'l Secretariu Xeneral d'Izquierda Xunida d'Asturies Jesús Iglesias y nes qu'afirmaba que'l so partíu taba dimpuestu a iguar una fórmula pa inxertar la oficialidá del asturianu na redacción del estatutu d'autonomía "ensin qu'ello suponga imposición nin obligación del conocimientu de la llingua" sacaron angüeñes nes files del Bloque por Asturies, formación política cola qu'IX se presentó a les elecciones autonómiques del 2003 y compañera de viaxe d'IX nel gobiernu asturianu de coalición.

En declaraciones a Asturies.com, el dirixente del Bloque por Asturies Rafael Palacios manifestó nun compartir les opiniones qu'espresare Jesús Iglesias, y ello por motivos distintos. Asina, pa Palacios la ufierta d'Iglesias d'una oficialidá qu'especificare la "non obligatoriedá" del asturianu supón enclicase a los deseos de la FSA al empar que "apoyar y reconocer l'argumentu mentirosu y falsu col que trabaya'l PSOE d'identificar oficialidá con imposición, cosa que ye mentira dafechu como tendría de saber Jesús Iglesias". El director de Cooperación del Gobiernu asturianu asitió'l debate sobre la oficialidá "nel del reconocimientu d'un derechu humanu y civil" y declaró'l so malcontentu pola actitú de Jesús Iglesias, "que dio la impresión que taba pidiendo perdón por reclamar lo que ye'l reconocimientu d'un derechu".

Otramiente, el representante del BA declaró a Asturies.com que, al revés que Jesús Iglesias, elli nun taba "esperanzáu pola posición de la FSA énte la reforma del estatutu". Pal Bloque por Asturies "l'actitú de la FSA nun tien nada que ver cola actitú abierta y negociadora que tien el PSOE n'otres comunidaes o nel mesmu gobiernu del estáu". Pa Rafael Palacios "ye falso que la FSA quiera dir a un estáu federalizante" pero'l malcontentu del líder del BA énte traza que presenta'l procesu de reforma estatutaria espurrióse a más sectores y asina declaró que "tamos entamando a perder la esperanza n'otres organizaciones que paez qu'empiecen elles a perder fuerza na reivindicación de derechos y cuestiones que nos abulten elementales".

El desalcuerdu ente Palacios y Iglesias llega tamién a la llectura que los dos faen del momentu políticu n'Asturies. Si'l coordinador d'IX llamentaba la pasividá del PP énte'l procesu de reforma del estatutu d'autonomía y cargaba sobre esta formación la culpa de que tea allancáu, pa Palacios "ye falso que la pelota de la reforma tea en teyáu del PP, y lo que cabe entrugase ye por qué se reformen los estatutos de les demás autonomíes mientres equí lo que se ve ye una desgana xeneralizada por reformar". El representante del BA diz que "Toos deberíemos entruganos, y non solo'l PP, por qué Asturies nun merez una reforma estatutaria y por qué los asturianos y asturianes nun tenemos accesu a los derechos humanos que sí se reconocen en Valencia, Cataluña, Galicia y otres comunidaes onde gobiernen el PSOE y el PP y nes que sí que se reconoz la oficialidá".

Nel contestu en que se mueve'l debate n'Asturies, el casu del estatutu gallegu abúlta-y especialmente sangrín al representante del BA, que sorraya como nel titulu preliminar la carta magna gallega "afita que la llingua propia de Galicia ye'l gallegu y que gallegu y castellanu son los dos idiomes oficiales de la comunidá teniendo tolos ciudadanos derechu a usalos" una redacción que pa Palacios equival a "una oficialidá ensin condiciones, ensin diferimientos y ensin concesiones, que ye la que nosotros reclamamos, non como fizo'l señor Iglesias". Palacios afirmó que'l BA va pidir esplicaciones a IX por estes declaraciones y acusó a Iglesias de "dá-y carta d'identidá a un argumentu falsu y avergonzase de pidir un derechu humanu"