Rafael Lorenzo presenta “Pabirum pabirum”

El veteranu cantautor de Tinéu Rafa Lorenzo presenta esta tarde n'Avilés "Pabirum, pabirum", un trabayu sobre la vida contemporánea de los vaqueiros. El discu supón l'apaición de "Trabe Música" la estaya discográfica de la editorial que dirixe Antón García.

Rafa Lorenzo presenta esti "Pabirum, pabirum" a les 20:15 na Casa de Cultura d'Avilés. Dempués del anterior "Sou Vaqueiru" nel que se metía más per temes antiguos, esti discu nuevu mez la vaqueirada tradicional con otros estilos como'l blues, el pop-rock o la electrónica, tratando nes lletres tamién asuntos más modernos como'l del llobu, la engarradiella ente Somiedu y Lleón por asitiar la raya con Cabrillanes o mesmamente la crisis de la minería nel occidente asturianu.

Rafa Lorenzo enxerta nesti discu producíu pol so fíu collaboraciones de dellos artistes de mui distintos xéneros ente les que rescamplen les de la cantante de tonada Mari Luz Cristóbal, la del guitarrista de blues Rody Herrera o la presencia de Xosé Ambás del grupu "N'Arba".