Rafa Palacios y Yolanda Huergo presenten el "Compromisu por Asturies" de Bloque y UNA

L'actu, que foi presentáu pol diputáu del Bloque, Roberto Colunga, cuntó col apoyu d'una amplia representación de persones venceyaes al asturianismu, la izquierda y l'ecoloxismu. El nome de la coalición incorpora, amás de los de Bloque y UNA, "Compromisu por Asturies".
 
La presentación de la coalición ente Bloque por Asturies y UNA, nun céntricu hotel d'Uviéu, sirvió tamién pa que les dos formaciones alantraren parte de la so estratexa de campaña y precampaña pa les elecciones del próximu mayu.
 
Tres la presentación de Roberto Colunga, intervinieron Yolanda Huergo, númberu 2 de la candidatura pela circunscripción central y miembru de la Executiva d'UNA, y Rafael Palacios, candidatu a la presidencia y miembru del Bloque. Huergo fixo una llamada al optimismu apellando a la necesidá del trabayu conxuntu pa qu'Asturies tenga "una fuerza autónoma", y Palacios, faló de la necesidá d'osixenar la política asturiana y de la participación y la suma nesti proyectu. El númberu 1 de la coalición, acabó la so intervención pidiendo un debate na TPA de toles fuerces polítiques.
 
Na sala, amás de la prensa, atopábense sofitando la convocatoria alredor de 20 persones que la coalición escoyó como representantes de colectivos o sectores a los qu' aspira a representar electoralmente; xente como Xune Elipe, Xosé "Ambás", Carlos Lastra, Tina Cuadriello, Nuria Rodríguez, Teresa Suárez, Norberto Martín, Dani Rodríguez, Iris Díaz, Alberto Buznego "Rizos" o Fernando Ornosa, ente otros.
 
Nel actu tamién se dio anuncia de que, amás de los nomes de Bloque y UNA, la denomación de la coalición y la so imaxe incorporará un tercer nome "Compromisu por Asturies", col que pretender espeyar "per un llau el compromiso de Bloque y UNA con esti proyectu, y per otra l’espaciu d’alcuentru nel que nos vamos atopar les dos organizaciones, con toles persones que nos van ayudar a construir esti espaciu políticu y que se van comprometer con nós nesta xera tan difícil como necesaria y posible".