Radio Sele intensifica la busca d’un llocal pa poder emitir pela FM

|

Pese a la situación complicada que ta viviendo Radio Sele, lo sos responsables intensifiquen la busca d’un llocal. L’oxetivu ye dar con unes instalaciones afayadices pa instalar una antena y recuperar la emisión pela FM casi dos años depués.

Na xunta celebrada la selmana pasada decidióse tirar p’alantre colos pocos medios disponibles y intensificar la busca d’un llocal pa continuar les emisiones enantes de tomar una decisión definitiva. El presupuestu estimáu pa que la emisora de radión única n’asturianu dafechu siga furrulando ye d’unos 600 mensuales, esto ye, más de 6.000 euros añales, una cantidá a la que nun lleguen les cuotes aportaes polos 30 socios actuales de Radio Sele, situación que lleva a la canal a continuar cola campaña de captación d’asociaos. La cuota mínima ye de 6 euros al mes, anque hai la posibilidá tamién d’aumentar la cantidá a aportar según la capacidá económica de caún.

De momento, Radio Sele emite namái música per Internet, canal de difusión de los sos programes dende que n’ochobre del 2011 viose obligada a zarrar les emisiones pela FM al considerar Telecomunicaciones que la so antena yera illegal. Los sos responsable entienden que ye clave recuperar el 106.1 de la FM pa consolidar el futuru de la emisora y esta mesma tarde Xuan Xosé Mariño, el so direutor, va visitar dellos llocales posibles pa facer el treslláu. “Nun ye tarea fácil, yá que tien que cumplir delles condiciones pa poder instalar l’antena y tar preferiblemente nun sitiu altu”, afirma. En feches próximes los socios van celebrar otra xunta pa tomar una decisión al respeuto.

 

Contador Estadistiques