Radio Alma, premiu de los asturianos en Londres

La emisora de radio asturiana en Bruseles "Radio Alma" recibió'l premiu "Astures" de l'Asociación "Andecha Cultural" grupu d'Asturianos en Londres que reconoz el llabor de la entidá que más faiga pola promoción de la cultura asturiana nel esterior.

Radio Alma ye una emisora local de radio qu'emite pa tola ciudá de Bruseles con una programación mayoritariamente en castellanu, llingua común pa los más de 20.000 oyentes que tien na capital belga, y ye qu'esta radio emite pa les comunidaes emigrantes españoles y tamién d'américa del sur y italianes asitiaes na capital de la UE. Con too y con ello, el colectivu fundador de la emisora son xente de procedencia asturiana, una procedencia que ye tamién mayoritaria ente l'audiencia de la radio, que tien programes específicos sobre temes asturianos. La radio tresciende tamién lo que ye l'ámbitu de les ondes y entama actividaes culturales na ciudá, desarrollando a lo llargo del añu 2004 un programa de conciertos de grupos asturianos pel que pasaron Tarañu, Felpeyu o Deua Dubra ente otros.


Pela so parte, l'asociación "Andecha pola Cultura Asturiana" representa a un colectivu d'Asturianos en Londres, estudiantes y profesionales mozos que viven na capital inglesa que decidieron fundar nel añu 2000 esta asociación cultural que dende l'añu pasáu entrega'l premiu "Astures" que l'añu pasáu foi pal Centru Asturianu de Buenos Aires na persona del desapaecíu Manolo del Campo. La entrega del premiu d'esti añu a Radio Alma va celebrase nel trescursu d'una espicha'l 26 febreru en Londres