Río Narcea Gold Mines denuncia a una profesora de la Universidá d’Uviéu

La empresa multinacional minera Río Narcea Gold Mines tien denunciada énte los tribunales a la profesora Ana Quero Martínez, titular del departamentu de Bioloxía d'Organismos y Sistemes de la Universidá d'Uviéu a cuenta d'una entrevista que-y ficieron nel diariu "La Nueva España" el pasáu mes d'agostu en plena polémica pola solicitú de Río Narcea pa entamar una mina d'oru en Salave (Tapia) solicitú qu'a la fin refugó'l gobiernu asturianu tres d'intenses movilizaciones de vecinos y ecoloxistes. Naquella entrevista la profesora afirmaba que de concedese la mina, esta diba tener un impactu nel llugar mayor del que tuvo nel so día la marea prieto del petroleru Prestige.

La empresa que dirixe Alberto Lavandera consideró como falta al respetu y insultu les declaraciones de la profesora, denunciándola énte los tribunales d'Uviéu. Pa esti llunes les partes tan convocaes pa un actu de conciliación énte'l que les organizaciones ecoloxistes y movimientos vecinales afectaos pola mina quixeron solidarizase cola profesora denunciada. Nuna carta firmada por 13 colectivos distintos, acúsase al responsable de la emprea minera de "meter miéu dende'l so cargu a les personas que como la doctora Ana Quero s'atrevieron a manifestase públicamente nos medios de comunicación contra'l proyectu de mina d'oru de Salave". Ecoloxistes y vecinos de Salave afirmen nel so escritu de solidaridá qu'una empresa como Río Narcea "que fai obres illegales y de gran impactu ambiental y qu'engaña a los vecinos y a la opinión pública sistemáticamente convirtiendo Asturies nel vertederu subvencionáu de residuos contaminantes d'otros países -en referencia al procesu de mineral d'oru de Groenlandia que se fai nes plantes de tratamientu de Río Narcea- nun tien llexitimidá moral pa denunciar a naide".